Qazaqstan prezıdenti Qasym-Jomart Toqaev tótenshe jaǵdaı kezinde tabysynan aıyrylǵandarǵa eń tómengi jalaqy mólsherinde, 42500 teńge járdemaqy tóleýdi tapsyrdy. Bul týraly ol búgin Aqordada tótenshe jaǵdaı jónindegi memlekettik komısıa otyrysynda aıtty. 

"Karantın engizilgen soń tek Almatynyń ózinde kásiporyndardyń qyzmetkerler sany 266 myń adamǵa qysqarady. Dál osyndaı jaǵdaı jeke kásipte de baıqaldy. Olardyń 80 paıyzy óz qyzmetterin toqtatty. Osylaısha, aldyn ala esepteýlerge sáıkes, tótenshe jaǵdaı shamamen 500 myń azamattyń qarjylyq jaǵdaıyna keri áserin tıgizdi. Sondyqtan tótenshe jaǵdaı kezinde tabysynan aıyrylǵandarǵa eń tómengi jalaqy mólsherinde, 42500 teńge járdemaqy tóleýdi tapsyramyn" dedi Toqaev.

Prezıdent járdemaqy tóleýdiń tıimdi jáne ashyq tetigin ázirleýdi tótenshe jaǵdaı jónindegi memlekettik komısıaǵa tapsyrdy. Iaǵnı, tabysynan aıyrylǵandarǵa járdemaqy tóleý tártibin tótenshe jaǵdaıǵa baılanysty qurylǵan memlekettik kommısıa sheshedi. 

Budan bólek, Toqaev úkimet pen jergilikti ákimdikterge qosymsha qarajat taýyp, koronavırýsqa qarsy is-sharalarǵa jumyldyrylǵan dárigerlerge, polıseılerge jáne ózge de mamandarǵa 1 laýazymdyq jalaqy kóleminde syıaqy tóleýdi tapsyrdy. 

Prezıdent Toqaev Qazaqstanda koronavırýsqa baılanysty 15 sáýirge deıin tótenshe jaǵdaı jarıalaǵan bolatyn. Al 19 naýryzdan bastap eldiń eki iri qalasy – Almaty men Nur-Sultan karantınge jabyldy. 

Densaýlyq saqtaý mınıstrliginiń sońǵy aqparaty boıynsha, elde 62 adamnan koronavırýs tabylǵan.