Nur-Sultanda alǵash ret onlaın toı ótkizildi, dep habarlaıdy Qamshy.kz aqparat agenttigi Almaty.tv. deregine súıenip.
Derekkóz málimdegendeı, jas jubaılar elimizde alǵash ret ata-anasynan beıneqońyraý arqyly aq bata alǵan. Onyń ústine, nekesin onlaın qıǵan Azamat pen Ásel mańyzdy rásimdi Ulystyń uly kúnine oraı josparlaǵan.
Dálirek aıtqanda, bastapqy sheshim boıynsha qudalyq pen uzatý, neke qıý Arys qalasynda 22 naýryzda ótedi dep kútilgen.
Toı ıesi Azamat Asqaruly eldegi jaǵdaıǵa baılanysty áýelde ne isterin bilmeı qalǵanyn jetkizgen.
"Árıne, qyz uzatý bolmaıdy, tek qudalasý bolady Alla buıyrtsa. Osy dertten aman shyqsaq, eki jaqtyń tanysýy bolady. Onyń bári alda. Bizdiń nıetimiz ben josparymyz boıynsha neke qıý Arys qalasynda ótýi kerek bolǵan. Biraq bári osy jaqta boldy. Onyń barlyǵyn jubaıymnyń ata-anasy, ápkelerimiz telefon arqyly habarlasyp, syrǵa salýdyń barlyǵyn ústel barysynda barlyǵyn kórsetti", – dedi Ásel Ábdimálikqyzy.
Al jas jubaılardyń týǵan-týystary men jaqyndary jyly sózder men tilekterin áleýmettik jeliler arqyly jáne beıneqońyraýlar arqyly jetkizip, onlaın quttyqtaǵan.
Eldegi jaǵdaıǵa túsinistikpen qaraǵan eki jastyń týystary jazǵa deıin jaǵdaı túzeledi dep úmittenedi.
Pikir qaldyrý