"Bil oılan" youtube arnasynda Fransıada turyp jatqan Omar Ábdiqaharuly  atty etnıkalyq qazaqtyń  otbasymen koronavırýs juqtyrǵanyn aıtqan vıdeoúndeýi jarıalandy. Úndeýde naýqas úı karantıninde qandaı em alyp, qalaı kútinip jatqanyn baıan etken.

Onyń aıtýynsha, 14-15 naýryzda otbasynda alǵash úlken qyzynda koronavırýs anyqtalǵan. Onyń jasy 10-da. 17 naýryzda jubaıy syrqattansa, 21 naýryzda ózinen syrqat belgileri baıqalǵan. 22 naýryzda 4 jasar ulynda, 24 naýryzda kenje qyzynda vırýs anyqtalǵan.

– Assalaýmaǵaleıkým, Qazaq eli. Meniń atym – Omar. Fransıada turamyn. Dúnıeni alasapyranǵa salǵan koronavırýspen otbasym juǵymdaldy. Bul vırýstyń belgileri otbasymyzda árkimde árqalaı bastaldy. Sizderge aýrýdyń belgileri qalaı bastalǵanyn bólispekpin. 17 naýryzdan bastap biz vırýs juqtyrǵanymyzdy sezindik. Bastapqyda qyzym aýyrdy. Biraq biz syrqatty vırýspen baılanystyrǵan joqpyz jáne juqty dep oılamadyq. Óıtkeni qyzym jótelip, birinshi kúni tamaǵy aýyrdy, ekinshi kúni qyzýy kóterilip, úshinshi jáne tórtinshi kúnderi ózine kelip, jaqsara bastady. Qazir jaǵdaıy jaqsy, – dedi Omar Ábdiqaharuly.

Sondaı-aq ol áıiliniń de tamaǵy aýyryp, jótelip, denesi qyzǵanyn atap ótti.

Al Omardyń vırýspen kúreskenine búgin altynshy kún.

– Bastapqyda meniń tamaǵym aýyryp, ertesine jótel men qyzýym boldy. Keshe túnde de qyzý bolǵan. Qazir ókpemnen birdeńe ustap, túıilip turǵandaı. Artyq tynys alsam, aýyrady. Qazir jaqsymyn. Aldaǵy ýaqytta bul vırýsty Allahtyń qalaýymen jeńip shyǵamyz dep úmittenemin, – dedi Omar.

Ol dárigerler aıtqan qajetti dári-dármekterdi iship, ımýnıtetti kóteretin jemis-jıdekterdi jep jatqanyn aıtty. 

– Qurmetti Qazaq eli, sportpen aınalysqan maǵan myna aýrý maǵan osylaı áser etip jatqanda, jasy úlkenderdiń qandaı deńgeıde aýyratynyn oılap túsiný qıyn. Sol sebepti aýrýdan saqtanyp, toptasqan jerlerge barmańyzdar. Tipti biz vırýsty otbasymyzben qalaı juqtyryp alǵanymyzdy áli kúnge deıin bilmeımiz. Qazaq elin bul aýrýdan saqtanýǵa shaqyramyn, – degen Omar Ábdiqaharuly qazaqstandyqtarǵa úıden shyqpaýǵa keńes berdi.