Elbasy, «Nur Otan» partıasynyń Lıderi Nursultan Nazarbaevtyń tapsyrmasy boıynsha partıaishilik tańdaý ­– praımerızdi koronavırýske baılanysty eldegi ahýal turaqtanǵannan keıin ótkizý týraly sheshim qabyldandy. Ortalyq apparat qazirgi kezde praımerız ótkizý barysynda onlaın-tehnologıany paıdalaný múmkindigin de pysyqtap jatyr.

Bastapqyda partıaishilik tańdaýdy bıylǵy 30 naýryzdan bastaý josparlanǵan edi. Keıinnen ony ótkizý merzimi 15 sáýirge aýystyryldy. Bul rette Saıası keńes otyrysyn ótkizýdiń toqtatylǵanyn eskere otyryp, praımerız ótkizý erejesiniń jobasyn qabyldaý boıynsha daýys berý syrttaı júrgizildi. Bıylǵy 26 naýryzda Praımerız ótkizý erejesi bekitildi.

«Praımerız ótkizýdi ahýal tolyq turaqtanǵa deıin keıinge qaldyra turý kerek. Qazir «Nur Otan»-nyń qyzmeti tolyqtaı qaıta baǵdarlandy. Partıanyń barlyq resýrsy Prezıdent Qasym-Jomart Toqaev bastamasymen qolǵa alynǵan koronavırýspen kúres jaǵdaıynda muqtaj qazaqstandyqtarǵa kómek uıymdastyrý sharalaryna qoldaý kórsetýge baǵyttaldy», – dep atap kórsetti eldiń Tuńǵysh Prezıdenti Nursultan Nazarbaev.

Elbasynyń tapsyrmasy boıynsha «Kedergisiz keleshek», «Baqytty otbasy» jáne «Ardagerlerdi ardaqtaıyq» partıalyq jobalary aıasynda «Nur Otan» partıasy jalǵyz basty qarttarǵa, múgedekterge jáne turmysy tómen kópbalaly otbasylarǵa ataýly kómek kórsetý úshin 150 mln. teńge baǵyttaǵanyn atap ótken jón. Koronavırýs indetiniń taralýyna qarsy kúreske Tuńǵysh Prezıdent Qorynan taǵy da 200 mln. teńge bólindi.

Bólingen qarajattyń arqasynda partıa belsendileri men «Jas Otan» volonterlary kún saıyn halyqtyń áleýmettik álsiz sanattaryn antıseptıka jáne gıgıena quraldarymen, birinshi kezekte qajet taýarlarmen jáne basqalarmen baılanyssyz taratý jolymen qamtamasyz etýde. Sonymen birge «Nur Otan» partıasy Nursultan Nazarbaevtyń bastamasymen koronavırýspen kúres jaǵdaıynda muqtaj azamattarǵa qoldaý kórsetý úshin qurylǵan «Birgemiz» qoǵamdyq qoryna óziniń barlyq uıymdyq resýrsyn qaıtarymsyz negizde usyndy.