Eldegi tótenshe jaǵdaıǵa baılanysty azamattardyń densaýlyǵyn saqtaý jáne Qazaqstanda koronavırýstyń taralýymen kúres júrgizý maqsatyndaǵy sharalar josparyna sáıkes «Til-Qazyna» ortalyǵy «Memlekettik tildi oqytý ádistemesi» atty onlaın kýrs uıymdastyrady.

Onlaın kýrsqa Til basqarmalary qyzmetkerleri, oblystyq jáne aýdandyq tilderdi oqytý ortalyqtarynyń oqytýshylary, ádiskerleri men til mamandary jáne osy taqyrypta bilimin jetildiremin degen kez kelgen eresek azamat qatysa alady.

Kýrs barysynda memlekettik til jáne ony oqytý ádistemesine qatysty ǵalymdar men ádiskerler oı-pikirlerin, úzdik ádis-tásilderin ortaǵa salyp, ózara tájirıbe almasady. Elimizdegi ortalyqtardyń jumysyn sandyq júıege kóshirýde biryńǵaı elektrondy derekqordy paıdalaný joldary kórsetilip, zamanaýı pedagogıkalyq tehnologıalardy tıimdi qoldaný jaıly keńes-usynystar aıtylady, nátıjesi kórsetiledi. Sonymen qatar qazaq tilin oqytýdyń avtorlyq ádistemesin qalyptastyrý máselesi qozǵalyp, zamanaýı úlgidegi oqý keshenderin, ádistemelik materıaldaryn ázirleý jaıy talqylanady.

Onlaın kýrs mazmuny boıynsha memlekettik tildi oqytý tájirıbesi tanystyrylady, aýyzsha sózdiń tiltanymdyq negizderi, ádebı til normasy, emle erejeniń qalyptasý tarıhy, úzdik pedagogıkalyq tehnologıalar jaıly sabaq úlgileri kórsetiledi. Oqytý úrdisinde Google platformalary jáne taǵy basqa servısterdiń múmkindikterin paıdalaný arqyly oqytýshylardyń sıfrlyq saýattylyǵyn arttyrýǵa, sıfrlyq daǵdylardy meńgergen kreatıvti oqytýshylar ortasyn qalyptastyrýǵa yqpal jasalady. Memlekettik tildi qashyqtan oqytýdyń júıesin qurý jónindegi pikirler men ıdeıalar alǵa tartylady.

Onlaın kýrs baǵdarlamasyn www.tilalemi.kz saıtynan kórýge bolady. Onlaın kýrs qorytyndysynda qatysýshylarǵa sertıfıkat tabystalady.