Qazaqstan Jazýshylar odaǵynyń múshesi, «Alash» Halyqaralyq syılyǵynyń laýreaty, belgili aqyn, «Aqıqat» jýrnalynyń Bas redaktory Amanhan Álimuly qaıtys boldy. 

Ol 1952 jyly 20 qańtarda Túrkistan oblysy, Otyrar aýdany, Qojatoǵaı aýylynda týǵan. 1969 jyly sol aýyldaǵy Amangeldi atyndaǵy orta mektepti bitirgen.

1975 jyly QazUÝ-dyń jýrnalısıka fakúltetine oqýǵa túsip, 1981 jyly bitiredi. Oqýdy bitirgennen soń, 1981-1989 jyldar aralyǵynda respýblıkalyq BAQ «Qazaqstan pıoneri» («Ulan»), «Lenınshil jas» («Jas alash»), «Qazaq ádebıeti», «Túrkistan» jáne «Qazaq radıosynda» qyzmet etti.

1991-1993 jyldar aralyǵynda Máskeýdegi M.Gorkıı atyndaǵy Ádebıet ınstıtýtynyń janyndaǵy joǵarǵy kýrsynyń kúndizgi bóliminde oqıdy. 1994-2012 jyldar aralyǵynda «Zań gazetinde» jaýapty hatshy jáne sholýshy bolyp qyzmet etti.

Amanhan Álimuly Qazaqstan Respýblıkasynyń «Mádenıet qaıratkeri», M.Maqataev atyndaǵy syılyqtyń laýreaty (Alash» syılyǵynyń), «Jandos» atyndaǵy syılyqtyń ıegeri bolǵan. Ońtústik Qazaqstanǵa Eńbegi sińgen medalimen,  «Ult patrıoty» gramotasymen marapattalǵan.

«Ótkirdiń júzi», «Aınury alaqanymda», «Janymnyń japyraǵy», «Bes qońyraý», «Kezdesý» sekildi birneshe pýblısısıkalyq jáne óleńder jınaǵy shyqqan. «Ataqonys» atty jyr-jınaǵy jaryqqa shyqqan.