Baılanys operatorlary tótenshe jaǵdaı kezeńinde óz abonentterine qazaqstandyq domendik aımaqta ornalasqan ınternet-resýrstarǵa qosymsha tólemsiz kirýge, tipti telefon teńgeriminde qarajat joq bolǵan jaǵdaıda da qosylýǵa múmkindik beretin túrli sheshimder men tarıftik josparlar usynýda. Bul týraly tolyǵyraq azamattar óz baılanys operatorynan anyqtaı alady. El prezıdentiniń tótenshe jaǵdaı rejımi kezeńinde qazaqstandyqtarǵa qoldaý kórsetý jónindegi tapsyrmasyn baılanys operatorlarynyń oryndaý barysy týraly QR Sıfrlyq damý, ınovasıalar jáne aeroǵarysh ónerkásibi mınıstrliginiń mamandary aıtyp berdi.
Oqý oryndarynyń qashyqtan oqytý formatyna kóshýine baılanysty Internetti tegin paıdalanýdyń mańyzy zor. Elimizdiń iri baılanys operatorlary, onyń ishinde "Qazaqtelekom" AQ, "Transtelekom" AQ, "Astel" AQ, "Kar-Tel" JSHS, "Ksell" AQ, "Mobaıl Telekom-Servıs" JSHS budan buryn JOO saıttaryna, elektrondyq anyqtamalyq derekter bazasyna, onlaın-kúndelik, elektrondy bilim berý portaldaryna jáne QR Bilim jáne ǵylym mınıstrligi usynǵan basqa da bilim berý resýrstaryna tegin qosylý múmkindigin usynǵan edi.
Sonymen qatar, https://www.coronavirus2020.kz/kz koronavırýs týraly resmı ınternet-resýrsyn, https://egov.kz/cms/kk elektrondyq úkimet portaly men eGov Mobile mobıldi qosymshasyn paıdalaný kezinde trafık eseptelmeıdi jáne megabaıt shegerilmeıdi.
Medısına qyzmetkerlerine qoldaý kórsetý maqsatynda "Ksell" AQ, "Kar-Tel" jáne "Mobaıl Telekom-Servıs" JSHS koronavırýs indetine qarsy kúresip jatqan barlyq dárigerge tegin uıaly baılanys qyzmetin usyndy. Respýblıka boıynsha 20 000-nan astam medısına qyzmetkeri TJ kezinde uıaly baılanyspen ınternet paketin tegin paıdalanýda.
Azamattardyń epıdemıologıalyq jaǵdaıdan habardar bolýy úshin uıaly baılanys operatorlary 1406 call-ortalyǵyna uıaly telefonnan tegin qońyraý shalý múmkindigin usyndy. Azamattar atalǵan ortalyqqa qońyraý shalý arqyly mamandardan qajetti dárigerlik keńes ala alady.
"Qazaqtelekom" AQ jáne "Transtelekom" AQ TJ kezeńinde bekitilgen baılanys, Internet jáne sıfrlyq televızıa qyzmetteri úshin tólem jasamaǵan, ıaǵnı qaryzy bar jeke tulǵalardy atalǵan qyzmetterden ajyratyp tastamaý týraly sheshim qabyldady.
TJ rejımi kezinde "Kar-Tel" JSHS áleýmettik tarıftik josparyn paıdalanatyn abonentterine, ıaǵnı zeınetkerler, múmkindigi shekteýli jandar men muǵalimderge tegin baılanys jáne ınternet paketterin usynady. Sondaı-aq, barlyq uıaly baılanys operatorlary roýmıngtegi óz abonentterin bonýstyq teńgerimmen nemese áleýmettik jelilerge tegin ınternet-trafıkpen jáne týystarymen baılanysý úshin tegin messendjerlermen qamtamasyz etti.
TJ rejımi kezinde kásipkerlerge qoldaý kórsetý úshin keıbir operatorlar Internet qyzmetterine, karantınge jabylǵan saýda jáne qyzmet kórsetý oryndaryn qashyqtan baqylaý úshin beınebaqylaý qyzmetine tólem júrgizý tártibi jeńildetilgen arnaıy tarıftik josparlar ázirledi.
Qazirgi ýaqytta baılanys operatorlarynyń kúsheıtilgen jumys rejımine kóshkenin aıtyp ótken jón. Komýnıkasıa jelileriniń úzdiksiz jumys isteýi úshin baılanys arnalaryna táýlik boıy monıtorıń júrgiziledi. Sondaı-aq baılanys operatorlary 1414 call-ortalyǵynyń jumysyn kúsheıtý jáne memlekettik qyzmetshilerdiń qashyqtan jumys rejımine kóshýi úshin birqatar uıymdastyrý sharalaryn qabyldady.
QR Sıfrlyq damý, ınovasıalar jáne
aeroǵaryshónerkásibi mınıstrliginiń
baspasóz qyzmeti
Pikir qaldyrý