Qazaqstanda bankter tótenshe jaǵdaı kezinde kredıt boıynsha qaryz somasyn tóleýdi ýaqytsha toqtatý týraly sheshim qabyldandy. Dese de bul bank aldynda bereshegi bar barlyq azamattarǵa birdeı qatysty emes. Atalmysh aksıa aıasynda qandaı klıentter qamtylyp, kimder qalys qalatyny týraly Qamshy tilshisi ázirlegen materıaldan tanysýǵa bolady.

Kaspi.kz

Kaspi.kz nesıeler boıynsha aı saıynǵy tólemderdi 3 aıǵa keıinge qaldyrdy. Naýqan aqshalaı, taýar túrindegi nesıeler, avtonesıe, bólip tóleý, kredıttik karta men Kaspi Red qyzmetine qatysty, sondaı-aq barlyq nesıeler boıynsha qoldanylady. Tólem keıinge qaldyrylǵan 3 aıda qaryz somasyna aıyppul men ósimpul qosylmaıdy. Tek nesıe merzimi 3 aıǵa uzarady. Atalǵan merzimde jańa nesıe berilmeıdi.

Tólemdi keıinge qaldyrý múmkindigin eshqaıda shyqpastan Kaspi.kz mobıldik qosymshasyndaǵy arnaıy onlaın-servıs kómegimen iske asyrýǵa bolady. Ótinishterdi qabyldaý 2 sáýirden bastalmaq. Keıinge qaldyrý avtomatty túrde júzege aspaıdy. Ol úshin ár klıent qosymsha arqyly bankke ótinim qaldyrýǵa tıis. Bank ótinimdi maquldaǵan jaǵdaıda tólenbegen aılar úshin nesıe tarıhy buzylmaıdy. Al klıent bankke ótinim qaldyrmastan, kredıt boıynsha tólem jasalmasa, onda kredıt tarıhy buzylady.

Eskerte keterligi, aksıa 18 naýryzǵa deıin alynǵan nesıelerge ǵana qatysty qoldanylady. Sondaı-aq bank aldynda merzimi ótken bereshegi (prosrochka) bar klıentter atalmysh qyzmetti paıdalana almaıdy. Bank call-ortalyǵynyń nomeri – 9999.

Halyk bank

16 naýryz ben 15 maýsym aralyǵynda tólenbegen tólemder boıynsha aıyppul men ósimpul qosylmaıdy. Kredıt boıynsha tólemdi keıinge qaldyrý 16 naýryz – 16 sáýir aralyǵynda, ıaǵnı 1 aı kóleminde áreket etedi. Bank tólenbegen aıdyń somasyn nesıe merzimin bir aıǵa sozý arqyly sońynan óndirip alady. Aksıany 16 sáýirden keıin de sozý múmkindigi qarastyrylyp jatyr.

Kredıt tólemin keıinge qaldyrý boıynsha ótinim bank saıty arqyly onlaın túrde qabyldanady. Ótinim 10 jumys kúninde qaralyp, nátıje SMS habarlama arqyly beriledi nemese bank qyzmetkeri qońyraý shalyp aıtady. Keıinge qaldyrý kezinde bankpen qosymǵa kelisim jasalady. Ony saıt arqyly jeke kabınetten nemese mobıldik qosymshadan kórýge bolady.

Munda da klıenttiń bank aldynda merzimi ótken bereshegi bolmaýy kerek. Óıtpegen jaǵdaıda klıent aksıaǵa qatysa almaıdy. Merzimi keshiktirilgen kredıt boıynsha 16 naýryzǵa deıingi eseptelgen ósimpuldar esh ózgerissiz qalady. Al 16 naýryz ben 15 maýsym aralyǵynda ósimpul avtomatty túrde toqtatylady. Qosymsha suraqtar boıynsha 7111 nomerine habarlasýǵa bolady.

ForteBank 

Jeke tulǵalar men bıznes ókilderine tólem 90 kúnge keıinge qaldyrylady. Bul aralyqta aıyppul, ósimpul qosylmaıdy. Alaıda tótenshe jaǵdaıdyń klıent kirisi men bızneske áser etý jaǵdaıy dáleldenýge tıis. Bank saıty, mobıldik qosymsha arqyly ótinim bererde dálel bola alatyn tıisti qujat qosa tapsyrylýy kerek. Ol kelisim-shart, ákimshiliktiń eskertpesi, bıznes túriniń jabylǵanyn rastaıtyn qandaıda bir qaǵaz, jumystan shyǵarylǵany nemese aqysyz demalysqa jiberilgeni týraly anyqtama sekildi qujattar bolýy múmkin. Bank qyzmetkerleri qosymsha qujattar suratýy da yqtımal.

ForteBank-te de 16 naýryzǵa deıin merzimi keshiktirilgen kredıti barlardyń nesıe tólemi keıinge qaldyrylmaıdy. Bank call-ortalyǵynyń nomeri – 7575.

Sberbank

Kepilsiz nesıe boıynsha jeke tulǵalardyń kredıttik tólemin 3 aıǵa keıinge qaldyrý – merzimi ótken bereshek joq bolǵan jaǵdaıda ǵana qoljetimdi. Nesıe 16 naýryzǵa deıin alynǵan bolýy kerek. Klıentter birneshe kategorıaǵa bólingen. Áleýmettik osal top ókilderi, ataýly áleýmettik kómek alýshylar, jergilikti atqarýshy organda jumyssyz retinde tirkelgender úshin bank bar sharýany ózi isteıdi. Eshqaıda baryp, esh jerge ótinim qaldyrylmaıdy. Bank atalǵan sanatqa jatatyn klıentter týraly derekti kredıttik búrodan alysymen, klıentterge habarlasyp, tólemdi keıinge qaldyrýǵa ruhsatyn alady.

Al tótenshe jaǵdaıǵa baılanysty qarjylyq jaǵdaıy nasharlaǵan klıentter saıttaǵy úlgini júktep, toltyryp, skanerlep, elektrondyq poshtamen jiberýi kerek. Ótinimge qosa tabysty joǵaltqanyn rastaıtyn qujat, jumystan shyǵarylǵany jónindegi buıryq, aqysyz demalysqa jiberilgeni týraly joldama, naýqas qaǵasy sekildi qujattar mindetti túrde usynylýǵa tıis. Sheshim 10 jumys kúni ishinde shyǵarylady. Qosymsha suraqtar boıynsha 5030 nomeri arqyly operatordan suraýǵa bolady.

Jysan bank

Bank aldynda merzimi ótken qaryzy joq jeke tulǵalardyń 18 naýryzǵa deıin alynǵan tutynýshylyq jáne kepildi nesıesiniń tólemi 60 kúnge keıinge shegeriledi. Shegerý ındıvıdýaldyq negizde 3 aıǵa sozylýy da múmkin. Bul aralyqta barlyq nesıe boıynsha aıyppul, ósimpul qosylmaıdy. Ótinimdi bank bólimshesi arqyly, sondaı-aq info@jysanbank.kz elektrondyq poshtasyna úlgige sáıkes ótinish jazý arqyly berýge bolady. Bank call-ortalyǵynyń nomeri – 7711.

Tengri Bank

Atalmysh bankte jeke tulǵalardyń kepilsiz nesıeleri boıynsha 90 kún boıyna aıyppul men ósippul salynbaıdy. Jeke tulǵalar zabota@tengribank.kz poshtasyna, kásipkerler bizbirgemiz@tengribank.kz poshtasyna ótinim qaldyrýǵa tıis. Ótinim erkin formada jazylady. Onda nesıe rásimdelgen tulǵanyń derekteri tolyq kórsetilýi, telefon nomeri jazylýy mindetti. Tólemdi toqtatý naýqanyna barlyq klıentter qatysa alady. Bank call-ortalyǵynyń nomeri – 3434.

Bank Kassa Nova

Bank avtomattyq rejımde 16 naýryzdan bastap 3 aıǵa nesıe boıynsha tólem jasalmaǵany úshin aıyppul men ósippul salmaıdy. Tólenbegen aılardyń somasy qalǵan merzimge teńdeı etip bólinedi. Nesıe merzimi uzarmaıdy. Alaıda 16 naýryzǵa deıin klıenttiń tólenbegen nesıesi bolmaýy kerek. Ondaı bolǵan jaǵdaıda, klıent aksıadan qalys qalady. Tek merzimi 90 kúnnen asyp ketken nesıelerge 16 naýryzdan tótenshe jaǵdaı aıaqtalǵanǵa sheıin aıyppul men ósimpul salý toqtatylady. Bankke júginýdiń qajeti joq. Call-ortalyq nomeri – 595.

Álfa-Bank

Áleýmettik osal top ókilderi, ataýly áleýmettik kómek alýshylar, jergilikti atqarýshy organda jumyssyz retinde tirkelgenderdiń tólemderin bank 16 naýryz – 15 maýsym aralyǵynda shegeredi. Ol úshin bankke barýdyń qajeti joq, barlyǵy avtomatty túrde jasalady. Tótenshe jaǵdaıǵa baılanysty tabysy azaıǵan, qysqarǵan, aqysyz eńbek demalysyna jiberilgender de 16 naýryz ben 15 maýsym aralyǵynda Álfa-Bank Qazaqstan mobıldik qosymshasy arqyly 31 naýryz ben 15 maýsym aralyǵynda ótinim bildire alady. Qosymsha qujat kerek emes. Jeke tulǵalardyń merzimi 90 kúnnen asyp ketken kepilsiz nesıeleri boıynsha tótenshe jaǵdaı aıaqtalǵansha aıyppul men ósimpul salý toqtatylady. Bank call-ortalyǵynyń nomeri – 2051.

Bank SentrKredıt

Bank koronavırýs anyqtanǵan nemese karantınde bolǵan azamattardyń ǵana nesıe boıynsha tólemin keıinge shegerýdi qarastyrady. Aldymen kredıtti tóleý merzimin shegerý boıynsha ótinish jazylýy kerek. Ótinish úlgisi bank saıtynda tur. Ótinishti skanerlep nemese sýretke túsirip, fres@bcc.kz elektrondyq poshtasyna, ıa bolmasa +7 701 223 0228 nómiri boıynsha Whatsapp arqyly jiberý kerek. Ótinishpen qosa jeke kýálik sýreti men dıagnoz ben karantınde bolǵanyn rastaıtyn qujat qosa jiberilýi mindetti. Árbir ótinish derbes qaralady. Bank call-ortalyǵynyń nomeri – 505.

Bank Hoým Kredıt

Tótenshe jaǵdaı kezinde kredıtter jáne kredıt kartochkalary boıynsha merzimi ótken aı saıynǵy tólemder úshin turaqsyzdyq aıyby eseptelmeıdi. Sondaı-aq merzimi 90 kúnnen asqan kredıt boıynsha eseptelgen syıaqy da toqtatylady. Ol úshin Bankke júginý mindetti emes. Al jumysynan aıyrylǵan klıentterge bank tólemderdi 2 aıǵa keıinge qaldyrýǵa ruqsat beredi. Tólem demalysyn alý úshin klıentter 1 sáýirden keıin mobıldik qosymsha nemese kez kelgen bólimshe arqyly bankke júgine alady. Basty talap – klıenttiń merzimi ótken bereshegi bolmaýǵa tıis, nesıe 18 naýryzǵa deıin alynǵan bolýy kerek. Ári onyń aı saıynǵy tólemi tótenshe jaǵdaıdyń áreket etý kezeńine sáıkes kelýi kerek. Qosymsha suraqtar boıynsha +7 771 724 12 40 nomerine whatsapp arqyly habarlasýǵa bolady.

KMF

Ózge bankterdegideı kredıttik kanıkýl mıkroqarjy uıymynda da bar. Biraq uıym birneshe baǵyt boıynsha ártúrli nesıe qyzmetterin usynatyndyqtan ár klıent isi jeke qaralady. Ol úshin klıent mobıldik qosymshaǵa kirip, nesıe merzimin ózgertý sharttaryn jeke esepteýi kerek. Qosymsha suraqtar boıynsha 7474 nomerine nemese 8 701 801 74 74 whatsapp nomerge habarlasýǵa bolady.

ATFBank

Kredıt boıynsha tólem merzimin keıinge qaldyrý jónindegi ótinim bank saıty arqyly qabyldanady. Ótinim saıtta kórsetilgen arnaıy úlgi boıynsha toltyrylady. Ótinim berý kezinde klıent áleýmettik osal topqa jatatynyn rastaıtyn qujat pen tabysynan aıyrylǵany týraly anyqtamany qosa tirkeýi kerek. Ótinim bergennen keıin, Bank qyzmetkeri berilgen aqparatty naqtylaý úshin klıentpen habarladasy. Banktiń telefon nomeri – 2424, whatsapp nomeri – 8 705 766 88 62.

Eýrazıalyq bank

Bank tótenshe jaǵdaıǵa baılanysty jumysynan qysqarǵan, aqysyz demalysqa shyǵarylǵan klıentteriniń ǵana qaryzyn 3 aıǵa shegeredi. Ózge klıentter ádettegideı merzimde tóleı berýi kerek. Tóleý merzimi shegerilmegen klıentterdiń ótelmegen bereshegi úshin aıyppul pen ósimpul shart talaptary negizinde qosylady. Ondaı klıentterge eshqandaı jeńildik qarastyrylmaǵan. Tólem merzimin toqtatý týraly ótinim bank saıtynda júrgiziledi. Ótinimmen birge jumystan qysqarǵanyn nemese aqysyz demalysqa shyǵarylǵanyn rastaıtyn qujat qosa usynylýǵa tıis. Merzimi keshiktirilgen nesıeler boıynsha ótinishter qarastyrylmaıdy. Bankke 8727 332 77 22 nomeri boıynsha habarlasýǵa bolady.

Turǵyn úı qurylys jınaq banki

Bank 16 naýryzdan keıin ótelýi tıis tólemdi 90 kúnge shegerýge múmkindik beredi. Shegerilgen tólemge negizgi qaryz da, nesıe syıaqysy da kiredi. 16 naýryz ben 16 maýsym aralyǵynda ýaqytyly ótelmegen tólemder boıynsha aıyppul jáne ósimpul alynbaıdy. Bul klıent jazǵan ótinishtiń negizinde júzege asyrylady. Ótinishte keıinge shegerýdiń ne sebepti qajet bolǵany kórsetilý kerek, biraq bank qosymsha rastaý qujattaryn talap etpeıdi. Tólemdi shegerý týraly ótinish 2020 jylǵy 15 sáýirden bastap ınternet-bankıng arqyly qabyldanady. Onlaın-ótinish berý kezinde 2020 jyldyń 16 naýryzyndaǵy jaǵdaı boıynsha ýaqtyly ótelmegen nesıe tólemi bolmaýy kerek.