Búgin, 31 naýryzda Nur-Sultan qalasynda koronavırýs juqtyrǵan taǵy bir adam kóz jumdy. Bul aqparatty qalalyq densaýlyq saqtaý basqarmasynyń basshysy Sáýle Qısyqova habarlady.

Onyń aıtýynsha, kóz jumǵan adamnyń jasy 50-de bolǵan. 21 naýryzda aýrýhanaǵa jatqyzylǵan.

"Bir aı aýyryp, medısınalyq kómekke júginbegen. Jumysy jeke issaparlarmen baılanysty bolǵan. Onymen jaqyn aralasqan otbasy músheleri jáne áriptesteri barlyǵy 31 adam aýrýhanaǵa jatqyzyldy" dedi Qısyqova.

Qısyqovanyń aıtýynsha, marqumnyń eki týysynan koronavırýs tabylǵan. 

Qazir Qazaqstanda koronavırýstan qaıtys bolǵandar eki adamǵa jetti. Buǵan deıin 26 naýryzda Aqmola oblysy Qosshy aýylynda 64 jastaǵy áıel adam kóz jumǵan edi. 

Resmı aqparat boıynsha,  qazir elde koronavırýs juqtyrǵandar sany 325-ke jetken. Olardyń ekeýi kóz jumsa, 22 adam koronavırýstan jazylyp shyqty.