Almaty qalasy ákimdiginiń baspasóz ortalyǵynda qalalyq Qoǵamdyq densaýlyq basqarmasynyń basshysy Tileýhan Ábildaev megapolıstegi jaǵdaıǵa baılanysty brıfıń ótkizdi.

– Qazirgi ýaqytta Almatyda koronavırýstyq ınfeksıany juqtyrýdyń rastalǵan 82 jaǵdaıy tirkeldi. Onyń ishinde jeti adam stasıonarda emdelip, 14 kúndik úı karantınine shyqty. Olardyń qatarynda tórt er adam, eki áıel jáne bir bala bar, – dedi T. Ábildaev.

Búginde qalalyq juqpaly aýrýlar aýrýhanasynda barlyǵy 76 naýqas koronavırýstan emdelip jatyr, onyń ishinde 2-i bala bar.

T. Ábildaevtiń aıtýynsha, emdeýge jatqyzylǵandardyń biri Almaty oblysynyń turǵyny. 1971 jyly týǵan azamatsha JRVI belgilerimen jaǵdaıy nasharlap, Almatydaǵy kópbeıindi klınıkalyq aýrýhanasyna júgingen.

– Oǵan belgili bir zertteýler júrgizildi. Nátıjesinde ekijaqty tómengi dárejeli pnevmonıa anyqtaldy. Sondaı-aq COVID 2019-ǵa taldaýlar alynyp, nátıjesi rastaldy. 30-y kúni ol bizdiń qalalyq juqpaly aýrýlar aýrýhanasyna emdeýge jatqyzyldy, – dedi T.Ábildaev .

Búginde 66 naýqastyń jaı-kúıi qanaǵattanarlyq. Bir eresek naýqastyń jaı-kúıi aýyr jaǵdaıda qalyp otyr. Al 9 eresek adamnyń dárejesi ortasha (1 oblystyq) dep baǵalanyp otyr.

– Eki jasar balanyń jaı-kúıi jaqsaryp, qanaǵattanarlyq jaǵdaıǵa jetti. Búgin sońǵy taldaýlaryn kútip otyrmyz. Eger taldaýy teris nátıje berse, onda aýrýhanadan shyǵarýǵa daıynbyz, –  dedi ol.

Al jańadan anyqtalǵan toǵyz adamnyń barlyǵy basqa jaqtan kelgen adamdar. 30 naýryzda Ystambul – Almaty reısimen bes adam ushyp keldi. Altynshy naýqas 29 naýryz kúni Mınsk – Almaty reısimen jáne osy aıdyń ár kúnderinde Dýbaıdan taǵy úsh adam ushyp kelgen eken.

Búginde provızorlyq ortalyqtarda 697 adam karantınde jatyr. Onyń ishinde – 84 bala bar. Eki kúndik karantınde 1029 azamat jáne 3156 adam úı karantıninde jatyr.