Almaty ákiminiń birinshi orynbasary Erlan Qojaǵapanov brıfıń barysynda "karantın qashan aıaqtalady?"degen suraqqa jaýap berdi.

– Biz ázirge karantınniń qashan aıaqtalatynyn aıta almaımyz. Ol shtabtyń sheshimine baılanysty. Ózderińiz baıqap otyrsyzdar, elimizde ınfeksıa juqtyrý kórsetkishi ósip barady. Memleket basshysy óte mańyzdy sheshim qabyldady. Qazaqstanda 3,5 mln adam tabysynan aırylyp qaldy. Olardy azyq túlikpen qamtýǵa, turaqtylyqty saqtaýǵa qarajat bólinip jatyr. Kóptegen kásiporyndar men jumys oryndary salyqtan bosatyldy, – dedi E.Qojaǵapanov.

Buǵan deıin Almaty qalalyq densaýlyq saqtaý basqarmasynyń basshysy Tileýhan Ábildaev Almatyda turǵyndar karantın talaptaryn buljytpaı oryndasa, koronavırýstyń taralýy jaqyn arada tómendeıtinin habarlaǵan.