Aqtóbe oblysynda oqýshylar úshin 3 myń noýtbýk satyp alynady Bul týraly oblystyq máslıhattyń kezekten tys 43 sesıasynda málim boldy.

Áleýmettik osal sanattaǵy otbasy balalary úshin oblystyq búdjetten 480 mln teńge bólinetin bolady. Bul qarajatqa úsh myń noýtbýk satyp alý josparda bar.

Sonymen qatar, týyndaǵan jaǵdaıǵa baılanysty halyqtyń áleýmettik osal toptaryn qoldaýǵa 890 mln 680 myń teńge bólý josparlandy.

Bul qarjydan 44 myń otbasy 20 myń teńgeden qosymsha kómek alatyn bolady. Tótenshe jaǵdaıǵa baılanysty azyq-túlik jáne eń birinshi qajet taýarlarmen qamtamasyz etý úshin arnaıy jospar qurylyp, oblystyq búdjetten 500 mln teńge bólindi.

Qarajat qaıtarymdy negizde bólinetin bolady jáne birinshi kezekte áleýmettik mańyzy bar taýarlarǵa baǵany turaqtandyrýǵa baǵyttalady. Oblysta koronavırýstyq ınfeksıamen kúresý úshin birinshi kezekte qajetti medısınalyq jabdyqtardy satyp alýǵa 529 mln.teńge bólý josparlanyp otyr.