Prezıdenttiń tapsyrmasyn tıimdi júzege asyrý úshin Aqtóbe oblysynda áleýmettik qoldaýdyń barlyq sharalary jasalýda. Tótenshe jaǵdaı kezinde halyqtyń áleýmettik osal toptaryn qoldaýǵa búdjetten 900 mln.teńge bólindi. Bul 44534 otbasyǵa kómek bolmaq.

Azyq-túlik jáne birinshi kezektegi turmystyq taýarlarymen qamtamasyz etý úshin 500 mln.teńge bólindi. Bul birinshi kezekte áleýmettik mańyzy bar taýarlarǵa baǵany turaqtandyrýǵa baǵyttalady. Áleýmettik osal sanattaǵy 3 myńnan astam otbasynyń balalaryn qashyqtan oqytý úshin 500 mln. teńge qarajat bólindi. Koronavırýstyq ınfeksıamen kúresý úshin birinshi kezektegi qajetti medısınalyq jabdyqtardy satyp alýǵa 529 mln. teńge bólindi. Sonymen qatar, tótenshe jaǵdaı kezinde óńir halqyn qoldaý maqsatynda oblys ákimdigi komýnaldyq mekemelermen kelissózder júrgizý nátıjesinde Aqtóbe qalasynyń turǵyndary úshin sý, jylý, káriz tólemderiniń tarıfteri 20%-ǵa, elektr jaryǵy 10%-ǵa tómendese, oblystyń 5 aýdanynda (Alǵa, Muǵaljar, Temir, Hromtaý, Shalqar) bul tarıfter 50%-ǵa deıin tómendetildi. Jalpy osyndaı kómek kórsetý boıynsha  oblys basshylyǵynyń basqa da jeke iri kompanıalarmen kelisimderi bar. Aldaǵy ýaqytta da osyndaı kómek keledi. Jáne de dárihanalarǵa halyq úshin tıimdi baǵamen satylýyna beriletin bolady.