Almatyda Covid-19 ınfeksıasyn jeńgen taǵy 6 naýqas jazylyp shyqty. Olardyń beseýi – áıel bolsa, bireýi – er adam. Olardyń bári aýrýhanadan shyqqan soń birden 14-kúndik úı karantınine kóshirildi, dep jazady ákimdiktiń baspasóz hatshysy.

Aıta keteıik, aýrýdan jazylyp shyqqan eki naýqas 16 naýryz kúni Stambuldan kelse, eki adam 10 naýryz kúni Máskeý – Almaty baǵytymen ushyp kelgen. Taǵy bireýi 13 naýryz kúni Berlınnen kelse, endi bir adam osy ınfeksıa juqtyrǵan naýqaspen baılanysta bolǵan.

Sonymen qazirgi ýaqytta koronavırýs ınfeksıasynan emdelip, jazylyp shyqqandardyń jalpy sany Almatyda – 19 adam.

Eskerte keteıik, búgingi kúni qalalyq juqpaly aýrýlar aýrýhanasynda koronavırýs ınfeksıasyn juqtyrǵan degen dıagnozben 91 naýqas jatyr. Olardyń bireýi Almaty oblysynyń turǵyny (áıel adam).

Jalpy alǵanda, provızorlyq ortalyqtarda búginde 655 adam bar, olardyń 83-i bala, eki kúndik karantınde 523 azamat, al úı karantıninde 4411 adam jatyr.