Qazaqstan densaýlyq saqtaý mınıstrliginiń dereginshe, elde 120 medısına qyzmetkerinen kornavırýs tabylǵan. Olardyń 67-i koronavırýs indetin juqtyrǵan nemese aýrý belgileri bar adamdarmen jumys istegen.  Bul kórsetkish eldegi indet tabylǵan adamdardyń 10%-na teń. 

Mınıstrlik taratqan aqparatqa qarǵanda, koronavırýstan Nur-Sultan jáne Almaty qalasyndaǵy dárigerler qatty zardap shegip otyr. El astanasynda 31 medısına qyzmetkerinen indet tabylǵan. Al Almatyda vırýs juqtyrǵan 119 naýqastyń 21-i medısına qyzmetkeri.  Budan bólek, Soltústik Qazaqstan oblysynda 6 dárigerden, Qarǵandy oblysynda 4 dárigerden, Atyraý oblysynda 2 dárigerden, Aqmola, Qyzylorda jáne Túrkistan oblysynyń árqaısynda bir-bir dárigerden kornavırýs anyqtalǵan. 

Densaýlyq saqtaý mınıstrliginiń habarlaýynsha, koronavırýs indetin juqtyrǵan nemese aýrý belgileri bar adamdarmen jumys istegen bir medısına qyzmetkeriniń jaǵdaıy – aýyr, toǵyzynyń jaǵdaıy – ortasha. Al qalǵan 57 dárigerdiń jaǵdaıy – qanaǵattanarlyq. 

Prezıdent Qasym-Jomart Toqaev kornavırýspen kúresip jatqan dárigerlerge  ústeme aqy beriletinin aıtqan. Medısına qyzmetkerine koronavırýs ınfeksıasy juqqan jaǵdaıda 2 mln teńge kóleminde saqtandyrý tólem beriledi. Qaıtys bolǵan jaǵdaıda otbasyna 10 mln teńge beriledi.

Sońǵy aqparat boıynsha, Qazaqstanda 685 adamnan koronavırýs tabylǵan. Alty adam vırýstan kóz jumyp, 50 adam jazylyp shyqty.