Almaty qalasy ákimdiginiń baspasóz ortalyǵynda ótken onlaın-brıfıngte qalalyq Qoǵamdyq densaýlyq saqtaý basqarmasynyń basshysy Tileýhan Ábildaev koronavırýs indetimen kúresip jatqan medısına qyzmetkerlerine alǵashqy ústemaqylar tólene bastaǵanyn aıtty.

Búgingi kúni 500-den astam dáriger, 1,7 myń orta medısına qyzmetkeri, 549 kishi medısına qyzmetkeri jáne 764 ózge de densaýlyq saqtaý qyzmetkeri ózderine tıesili tólemderin alýda.

– Jalpy, 965 mln tg kóleminde 3557 medısına qyzmetkeri tólem alady. Bul esepteýler úsh sanat boıynsha júrgiziledi. Buǵan deıin Almaty qalalyq Balalar juqpaly aýrýlar aýrýhanasynyń medısına qyzmetkerleri, onyń ishinde aýrýlardy qabyldaý bólimi, laboratorıa, klınıkalyq-dıagnostıkalyq bólimderiniń mamandary qaterli indetpen kúnde betpe-bet kelip júrgenderin aıtqan bolatyn. Bul mekemeniń de barlyq medısına qyzmetkerlerine, onyń ishinde dárigerler, orta býyn medısına qyzmetkerleri, kishi býyn medısına mamandaryna úsh sanatqa sáıkes ústemaqy tólenetin bolady, – dedi Almaty qalalyq Qoǵamdyq densaýlyq saqtaý basqarmasynyń basshysy T. Ábildaev.