Jańadan tirkelgen 13 jaǵdaıdyń baılanys arqyly juqqany, taǵy bireýiniń syrttan kelgeni anyqtaldy. İndet juqtyrǵandardyń 11 – áıel, 3 – er azamat.

Búgingi kúni ınfeksıalyq stasıonarlarda 108 naýqas emdelip jatyr (bireýi oblystan), olardyń 4-ýi bala. Qazir 80 naýqastyń jaǵdaıy qanaǵattanarlyq, 7 adamda – aýyr, 21-inde – ortasha, bireýi oblystan. Onyń 12-i qalalyq stasıonardyń biriniń qyzmetkerleri. Olardyń arasynda eki dáriger jáne 10 meıirbıke bar.

2 er adamnyń jaǵdaıy polısegmentti pnevmonıaǵa ulasqandyqtan aýyr dep baǵalanýda. Qalǵandarynyń barlyǵynda – qanaǵattanarlyq.

– Ókinishtisi, qaýipti indetke shaldyqqandardyń ishinde turǵyndarǵa medısınalyq kómek kórsetetin medısınalyq uıymdardyń qyzmetkerleri bar. Turǵyndardyń úreılenbeýlerin suraımyz! Atalǵan sanattaǵy adamdar karantınge qaramastan, ózderiniń kásibı mindetterin atqarǵanyn eskertkimiz keledi. Medqyzmetkerler aldyńǵy shepte eńbek etip júrgendikten, olarda indetti juqtyryp alý qaýpi joǵary bolady. Olar kómekke muqtaj kez-kelgen azamatqa qyzmet kórsetip júr. Sondyqtan indetti de kez-kelgen adamnan juqtyrýy múmkin. Tipti, aýrý sımptomy joq bola tura, tasymaldaýshy bolyp júrgen adamnan da juqtyrýy yqtımal. Qazirgi ýaqytta epıdeomologıalyq tergeý jumystary júrgizilýde.​ Bul jaǵdaı qalalyq Jedel shtabtyń baqylaýynda. Infeksıanyń taralýyna jol bermeý úshin naqty sharalar atqarylýda. Olarmen baılanysta bolǵan barlyq adamdar izdestirilip, karantınge jatqyzylady, – dep atap ótti qalalyq Qoǵamdyq densaýlyq basqarmasynyń basshysy Tileýhan Ábildaev.

​Jańadan anyqtalǵandardyń ishindegi qalǵan ekeýi jergilikti ınfeksıa juqtyrǵan adammen baılanysta bolǵan. Onyń biri 2000 jyly týylǵan jas jigit Kýala-Lýmpýr – Almaty reısimen ushyp kelgen eken. Ekinshisi 24 jastaǵy qyz stasıonarda karantınde jatyr.

Búginde megapolıste qaýipti indetten 28 naýqas emdelip shyqsa, ekeýi qaıtys boldy. Qaladaǵy provızorlyq ortalyqtarda 138 adam bar, onyń 9-y bala. Sonymen qatar, 368 turǵyn oqshaýlandyrylsa, úı jaǵdaıyndaǵy karantınde 5334 azamat jatyr.