Assyltas qoǵamdyq qory Qazaqstanda jarıalanǵan tótenshe jaǵdaıǵa baılanysty qıyndyqqa tap bolǵan 200 otbasyǵa kómek berýge nıettenip otyr. Ár otbasyǵa 25 000 teńge qarajat úlestiriledi. Kómek alýshylar – kópbalaly otbasylar men jalǵyzbasty analar men ákeler.

Kómek kórsetý úshin qoǵamdyq qor 3 kún buryn qaıyrymdylyq aksıasyn bastaǵan bolatyn. Onyń shartyna sáıkes, osy merzimde qansha qarajat jınalsa, sony qor eki eselep, 100 otbasyǵa kómek berýi qajet bolǵan.

Qarjy jınaýǵa 351 adam járdemdesip, 3 kúnde 1 236 768 teńge jınaldy.

– Úsh kún buryn biz bul aksıany bastaǵan kezde qansha aqsha jınalsa, ústine sonsha qarjy bóletinimizdi aıtqanbyz. Halyqtyń yqylasy keń eken, qaıyrymdy jandardyń arqasynda biz endi mine 100 otbasyǵa kómektese alamyz, ótinishterdiń kóptigine baılanysty qor quryltaıshysy Dýlat Tastekeevpen keńese kele, bizdiń qor taǵy 100 otbasyǵa qarjylaı kómektespek. Iaǵnı, 200 otbasyǵa 25 000 teńgeden úlestiremiz, – dedi qoǵamdyq qordyń jetekshisi Raýan Oqas.

Kómek alý úshin kópbalaly otbasylar men jalǵyzbasty ákeler men analar qordyń elektrondy poshtasyna ótinish berýi qajet bolǵan. Qazirde myńnan astam adamnan ótinish túsken. Raýan Oqastyń aıtýynsha, qor qyzmetkerleri aldaǵy 3 kúnde ótinishterdi qarastyryp, muqtaj 200 adamnyń tizimin jasaıdy.

Qarjy olardyń banktegi esepshotyna aýdarylady. Al bul sharanyń ádil ótkeniniń dáleli retinde kómek alǵan otbasylardyń tizimi ashyq aqparat kózderinde jarıalanady.