Álemdik avıasıa ındýstrıasy koronavırýs pandemıasynan eń kóp zardap shekken salalardyń biri jáne avıasıa tarıhyndaǵy eń aýyr daǵdarysty bastan keshýde. Infeksıanyń jaǵymsyz saldary Qazaqstannyń azamattyq avıasıa salasyna da áser etti, dep habarlaıdy Indýstrıa jáne ınfraqurylymdyq damý mınıstrligi.
Qazaqstanda koronavırýstyń taralýyn boldyrmaý maqsatynda búgingi kúni 97 halyqaralyq baǵyt boıynsha aptasyna 438 reıs (442-den 4 jıilikke deıin) nemese barlyq halyqaralyq reısterdiń 99%-y qysqartylǵan.
Barlyq turaqty ishki reıster jabyldy. Qazirgi ýaqytta el aýmaǵynda turaqty áýe qatynasy joq.
Eger 2020 jyldyń 22 naýryzyna deıin 45 ishki baǵytta aptasyna 540 reıs (táýligine 77 reıs) oryndalsa, 2020 jyldyń 2 sáýirinen bastap Qazaqstan qalalary arasyndaǵy barlyq ishki turaqty reıster toqtatyldy.
Halyqaralyq Azamattyq avıasıa uıymynyń (IKAO) boljamyna sáıkes, 2020 jyldyń birinshi jartyjyldyǵynda áýe kompanıalar usynatyn oryndar sany 51% qysqarady, sondaı-aq tasymaldanǵan jolaýshylar sany 500 mıllıonǵa azaıady. Sonymen birge áýe kompanıalardyń operasıalyq shyǵyndary 124 mlrd AQSH dollaryn quraıdy.
Halyqaralyq áýe kóligi qaýymdastyǵy (IATA) 2020 jyly jolaýshylardan túsetin kiristiń joǵalýyn 252 mlrd dollarǵa baǵalaıdy.
2020 jyldyń naýryz-sáýir aılarynda Qazaqstanda tasymaldanatyn jolaýshylar sany 70%-ǵa azaıdy. Ushý reısteriniń qysqarýy men shektelýinen otandyq áýe kompanıalar 235 mlrd teńgeni, áýejaılar 24,5 mlrd teńgeni, «Qazaeronavıgasıa» RMK 28 mlrd teńgeni joǵaltty.
Qazaqstandyq tasymaldaýshylar jabyq áýejaılardan ǵana emes, ulttyq valúta baǵamynyń álsireýinen de zardap shegýde.
Pikir qaldyrý