Almaty qalasy ákiminiń orynbasary Erjan Babaqumarov SOVID-2019-ǵa kúdikti jáne olarmen qatynasta bolǵan adamdarǵa arnalǵan jańa modýldik aýrýhananyń qurylys alańynda bolyp, medısınalyq uıymnyń josparymen egjeı-tegjeıli tanysty.

Medısınalyq uıym aýmaǵynda koronavırýstyq ınfeksıamen aýyratyn naýqastardy oqshaýlaý jáne emdeý úshin 280 oryn ashylady, sonyń ishinde qarqyndy terapıa bólimshesi jumys isteıtin bolady.

Aýrýhanada qyzmetkerlerge arnaıy «taza» aımaqtar belgilengen, bolashaq ınfeksıalyq palatalarda bólek jeldetý júıesi qarastyrylatyn bolady.

Qazirgi tańda densaýlyq saqtaý basqarmasymen qajetti medısınalyq jabdyqtarmen jaraqtandyrý máselesi qarastyrylýda. Medısınalyq qyzmetkerlerdi jabdyqtaý boıynsha jumystar júrgizilýde. Jospar boıynsha shtat shamamen 280 dáriger men medısına qyzmetkerlerinen quralady.

Sapar barysynda qurylys jumystarynyń tarıhı ǵımarattar men arheologıalyq qundylyqtardyń saqtalýyn qamtamasyz etý normalarynyń saqtalýyna asa nazar aýdaryldy. Almaty qalasy Qalalyq josparlaý jáne ýrbanıstıka basqarmasynyń basshysy Almasqan Ahmedjanov salynyp jatqan gospıtál jaqyn ornalasqan qorǵan keshenine áser etpeıtinin baıandady.

– Qorǵan kesheni tarıhı-mádenı qordyń bas josparyna sáıkes qorǵalýda. Aýrýhanadan qorǵandarǵa deıingi qashyqtyq 150 metrden asady. Qorǵandardyń kúzet aımaǵy 50 metrdi quraıdy. Barlyq erejeler saqtalýda, – dep ýaqytsha qurylystyń jeńil qurylymdardan salynatynyn atap ótti Almaty qalasynyń bas sáýletshisi.

Qalalyq Mádenıet basqarmasynyń málimetterine sáıkes, qurylys jumystary bastalar aldynda Almaty qorǵandarynyń aınalasyndaǵy qorǵaý aımaqtary eskerildi. Salynyp jatqan modýldik qurylym Qorǵannyń qorǵaý aımaǵynan 50 metr qashyqtyqqa sozylyp, oǵan eshqandaı zaqym keltirilmegen. Qorǵan óz aýmaǵynan modýldik qurylymǵa deıin 170 metr qashyqtyqta, qorǵanys aımaǵynan 50 metr qashyqtyqta ornalasqan.

Óz kezeginde Á. H. Marǵulan atyndaǵy Arheologıa ınstıtýtynyń bas ǵylymı qyzmetkeri Arnabaı Nurjanov júrgizilgen saraptamalyq taldaýdyń qorytyndysy týraly habarlady.

– Biz qurylys josparymen tanystyq. Aýrýhana aýmaǵy tolyǵymen qorshalady. Qorǵanǵa deıingi shekaralyq aımaq 150 metr qashyqtyqta ornalasqan. Qorǵandardyń kúzet aımaǵy bólek bolady. Aıta ketý kerek, aýrýhana qurylysy qorǵandarǵa eshqandaı qaýip tóndirmeıdi, – dedi Arnabaı Nurjanov.

Máseleni sheshý jáne qurylys alańyn baqylaý barysynda Almaty qalasy ákiminiń orynbasary Erjan Babaqumarovpen qorǵan kesheniniń rekreasıalyq jospary jasaý qajettiligi alǵa tartyldy. Sonymee qatar, Almaty aýmaǵynda ornalasqan Qorǵandyq keshenderdi odan ári damytý keńesin qurý usynyldy. Onyń quramyna arheologtar men tarıhshylar qatarynan sarapshylar kiretin bolady.

Esterińizge sala keteıik, aǵymdaǵy jyldyń 3 sáýirinde QR Prezıdenti janyndaǵy Tótenshe jaǵdaıdy qamtamasyz etý jónindegi memlekettik komısıa koronavırýstyń taralýyna qarsy kúres sharalaryn júzege asyrý aıasynda Almaty qalasynyń aýmaǵynda gospıtál salý týraly sheshim qabyldaǵan bolatyn.