Almatyda koronavırýstyq ınfeksıany juqtyrý​dyń jańa 23 jaǵdaıy tirkeldi. Olardyń ishinde Balalar qalalyq klınıkalyq juqpaly aýrýlar aýrýhanasynyń 1 medısına qyzmetkeri, qalǵan 22 adam indet juqtyrǵan adammen baılanysta bolǵandar.

Sonda, jalpy qala boıynsha COVID-19 ınfeksıasyna shaldyqqan 393 naýqas tirkeldi, onyń ishinde 6 bala jáne​ 4 júkti áıel.

Qoǵamdyq densaýlyq saqtaý basqarmasynyń málimetine sáıkes, keshe koronavırýstyq ınfeksıa juqtyrǵan taǵy bir pasıent kóz jumdy.

– 1960 jyly týylǵan pasıent 8 sáýirden bastap júrek-ókpe jetkiliksizdigi, kaheksıasyna (aǵzanyń tozýy) baılanysty aýyr halde Ortalyq qalalyq klınıkalyq aýrýhanasynyń provızorlyq bólimshesinde emdeýde boldy. Alynǵan taldaýlary oń nátıje kórsetti, – dep habarlady Basqarma.

Sonymen qatar, keshe Covid-19-dan taǵy úsh pasıent saýyǵyp shyqty. Olardyń barlyǵy buǵan deıin vırýsty juqtyrǵan adamdarmen baılanysta bolǵandar, olardyń ishinde 2009 jylǵy bala bar.

Búgingi kúni emdeýden shyǵarylǵan adamdardyń sany 61 adamdy quraıdy.

Qazirgi ýaqytta ınfeksıalyq stasıonarlarda Almaty oblysynan bir áıel adamdy esepke alǵanda Covid-19-dan 330 pasıent emdelýde.

Provızorlyq gospıtáldarda​ 368 adam, onyń ishinde​ 7-ýi​ bala, karantındik oqshaýlaýda​ —​ 426, úı karantıninde​ — 7288 adam.