Qazaqstannyń avıasıa ákimshiligi Bek Air AQ-nyń sertıfıkatyn qaıtardy. Bul týraly Azamattyq avıasıa komıteti habarlady. 

"Qazaqstan Respýblıkasynyń áýe keńistigin paıdalaný jáne avıasıa qyzmeti týraly" Zańnyń 12 babynyń 5-tarmaǵyna, 16-9 baby 2-tarmaǵynyń 10 tarmaqshasyna sáıkes, "Qazaqstannyń avıasıalyq ákimshiligi" AQ jibergen buzýshylyqtardy joıý týraly nusqaýlardy oryndamaýyna baılanysty Bek Air AQ-nyń paıdalanýshy sertıfıkaty keri qaıtaryp alyndy. Sondaı-aq Bek Air AQ-nyń 9 Fokker áýe kemesiniń ushýǵa jaramdylyǵy sertıfıkattary qaıtaryldy" delingen habarlamada.

Endi tıisti qujattaryn alý úshin qaıtadan tolyq sertıfıkattaý rásiminen ótýi qajet.

Esterińizge salaıyq, Almatyda atalǵan áýe kompanıasynyń ushaǵy apatqa ushyraǵan soń  quqyq qorǵaý organdary kompanıanyń qyzmetine jospardan tys tekserý júrgizgen edi. Nátıjesinde ushý qaýipsizdigine áser etetin óreskel zań buzýshylyqtar anyqtalǵan.