Almatyda kásiporyndardy iske qosý karantın jaǵdaıynda barlyq talaptarǵa sáıkestigine aýdıt júrgizilgennen keıin ǵana júrgiziledi. Bul týraly qala ákimdiginiń baspasóz qyzmeti habarlady. 

Memlekettik komısıanyń sheshimi boıynsha, 20 sáýirden bastap, Almaty qalasynda kásiporyndardyń jumysyn kezeń-kezeńmen iske qosý sheńberinde: ónerkásiptik kásiporyndardyń, qurylys kompanıalarynyń, sondaı-aq aldyn ala jazylý boıynsha notarıýstardyń jáne Almaty qalasynyń Naýryzbaı aýdanyndaǵy HQKO bir bólimshesiniń (tek qana bızneske qyzmet kórsetý úshin) qyzmetine ruqsat etildi.

Osylaısha, qalada jumyspen qamtylǵandardyń jalpy sany birtindep, bir aıdyń ishinde taǵy da 90 myńǵa jýyq adamǵa kóbeıedi. Kásiporyndardy iske qosý olardyń jumysynyń ereksheligine baılanysty, kezeń-kezeńmen júrgiziletin bolady.

– Óz qyzmetin bastaıtyn kásiporyndar sanıtarlyq-epıdemıologıalyq talaptardy oryndap, jumys komısıasynan jumysqa ruqsat alýy kerek ekenin túsindirgim keledi. Komısıa quramyna SES, "Atameken" Ulttyq Kásipkerler palatasy jáne qalanyń Kásipkerlik jáne ınvestısıa basqarmasynyń ókilderi kiredi. Bul degenimiz, kásiporyndar birden jumysyn bastaı almaıdy. Ruqsatty olar jarıalanǵan jáne jumysqa daıyn bolǵan kezde ǵana alýǵa bolady. Biz jumys ornyna baryp tekserip, sodan keıin ǵana iske qosamyz, – dep atap ótti Almaty qalasy Kásipkerlik jáne ınvestısıalar basqarmasynyń basshysy Erkebulan Orazalın.

Sondaı-aq, iske qosylǵannan keıin jumys istep turǵan kásiporyndarǵa monıtorıń júrgiziletin bolady jáne ereje buzýshylyqtar anyqtalǵan jaǵdaıda, olardyń qyzmetin toqtata turýǵa deıingi sharalar qoldanylady.
Qyzmetkerlerdi COVID-19 ınfeksıasynan qorǵaý jónindegi is-sharalardyń tolyq tizbesi qalanyń barlyq ónerkásip jáne qurylys nysandary úshin ázirlendi. Jumys berýshiler qatań sanıtarlyq normalardyń saqtalýyna derbes jaýapkershilikte bolady.

Sonymen, nysandarda qyzmetkerlerdiń jaı-kúıine saýalnama júrgizip jáne olardy jýrnalǵa tirkeı otyryp, sondaı-aq teplovızorlardyń kómegimen baılanyssyz termometrıa arqyly kúndelikti aýysym aldyndaǵy medısınalyq tekserý júrgizý talap etiledi. Barlyq qyzmetkerlerdi medısınalyq maskalarmen jáne qolǵaptarmen, dezınfeksıalaýshy maılyqtarmen nemese teri antıseptıkterimen, sanıtaızerlermen qamtamasyz etý qajet.

Qyzmetkerler arasynda, onyń ishinde asqanalarda, qashyqtyqty saqtaý, keńesterdiń sanyn, sondaı-aq adamdardyń bir jerde kóp shoǵyrlanýyn barynsha qysqartý mańyzdy. Úı-jaılarda únemi dezınfeksıa jáne ylǵaldy jıystyrý, jeldetý jáne aýa baptaý júıeleri, sondaı-aq jeke gıgıena jáne t.b. arnalǵan sanıtarlyq toraptar jumys isteýi tıis.

Asqynǵan respıratorlyq juqpalar (joǵary temperatýra, jótel, tumaý) jáne basqa da juqpaly aýrýlar aıqyndalǵan qyzmetkerlerdi jumysqa jiberýge tyıym salynady. Bul jaǵdaıda, qyzmetkerdi dereý oqshaýlap, jedel medısınalyq járdem brıgadasyn shaqyrý qajet.

Osyǵan baılanysty, tıisti aýdıt júrgizilgennen keıin jáne kásiporynnyń karantın jaǵdaıynda jumys isteýge daıyndyǵy týraly qorytyndy berilgennen keıin ǵana olardy qyzmetkerler men kólik quraldary týraly derekterdi infoalmaty.kz bazasyna engize otyryp, Almaty qalasy boıynsha júrip-turýǵa ruqsat beriletin bolady.