Erjan Babaqumarov OQKA-nyń medısınalyq ujymymen beınekezdesý ótkizip, olardyń máselelerin sheshý boıynsha birqatar naqty tapsyrmalar berdi. Bul týraly ákimdiktiń baspasóz qyzmeti habarlady.

Almaty qalasynyń ákimi Baqytjan Saǵyntaevtyń tapsyrmasy boıynsha qala ákiminiń orynbasary Erjan Babaqumarov beınekonferensbaılanys rejıminde Ortalyq qalalyq klınıkalyq aýrýhananyń ujymymen kezdesý ótkizdi. Kezdesýge Densaýlyq saqtaý vıse-mınıstri Lázzat Aqtaeva, sondaı-aq qalalyq Qoǵamdyq densaýlyq basqarmasy men Taýarlar men qyzmetterdiń sapasy men qaýipsizdigin baqylaý departamentiniń basshylary, OQKA-nyń bas dárigeri qatysty.

Kezdesý barysynda naýqastar men aýrýhana qyzmetkerlerin ornalastyrýdyń, qaýipsizdiktiń sanıtarlyq-epıdemıologıalyq sharalaryn saqtaýdyń aǵymdaǵy jaǵdaıy talqylandy.

– Biz qalalyq aýrýhananyń dárigerleri men medısınalyq qyzmetkerlerin qandaı jaǵdaı alańdatatynyn, qalyptasqan jaǵdaıdy tikeleı rettep, oryn alǵan máselelerdi sheshý úshin barlyq sharalardy qabyldaý maqsatynda jınalyp otyrmyz, – dep atap ótti Erjan Babaqumarov.

Sondaı-aq, ol aýrýhana ujymyna juqtyrý jaǵdaılaryna qaramastan, sabyrlyq tanytyp, jasaǵan jumystary úshin alǵysyn bildirdi.

Kezdesý barysynda suraqtar men usynystar jóninde hırýrgıa bóliminiń meńgerýshisi N. Kemelhanov, fızıoterapıa bóliminiń meńgerýshisi A. Tórequlova, nevrologıa bóliminiń meńgerýshisi G. Qusaıynova, reanımasıa bóliminiń meńgerýshisi G. Berdalına, travmatolog-dáriger G. Egemov jáne t. b. sóz sóıledi.

Kezdesý qorytyndysynda qala ákiminiń orynbasary Erjan Babaqumarov kóterilgen máselelerdi sheshý boıynsha birqatar naqty tapsyrmalar berdi.