Ýkraınalyq belgili "Oról ı reshka" baǵdarlamasynyń kezekti túsirilimderiniń birine Nú-Iorkte turatyn Qazaqstan azamaty Danıar Kojan tústi.

Ol Nú-Iorktyń pandemıa kezindegi tynys-tirshiligi, aýrýhanalardaǵy jaǵdaı, jalpy epıdemıologıalyq ahýal týraly baıan etken.

Danıar Kojan Almaty qalasynyń týmasy. Qazaq gýmanıtarlyq zań ýnıversıtetin "Quqyqtaný" mamandyǵy boıynsha bitirgen. Qazir Nú-Iorkte "Ballon Stoll Bader" zańgerlik kompanıasynyń pıar-menedjeri bolyp jumys isteıdi.

Onyń sózinshe, túsirilimge qatysý usynysy "Oról ı reshka" baǵdarlamasy  redaksıasynyń tarapynan bolǵan.

– 12 sáýir kúni Instagram paraqshama "Orel ı Reshka" baǵdarlamasynyń redaksıasynan habarlasty. Olar meniń Nú-Iorktegi qyzyqty jazbalarymdy kóripti. Mundaǵy jaǵdaı "óte qıyn" degendi estip, qalanyń qazirgi ómirin túsirip jiberýdi surady. Túsirilimde Nú-Iorktiń tanymal kóshelerin, dárigerlerdiń jumysyn, ýaqytsha qurylǵan aýrýhanalardy kórsetýge tyrystym, – deıdi Danıar.

Danıar buǵan deıin qazaqstandyq telearnalarda jýrnalıs, prodúser bolyp jumys istegen. Óziniń aıtýynsha, saıahattaǵandy burynnan jaqsy kóredi.

– Ózim saıahattaǵandy jaqsy kóremin. Ázirge 15 memlekette boldym. Amerıkaǵa anam ekeýmiz kelip, shtattardy aralaǵanbyz. Osylaısha, zańgerlik kompanıadan usynys túsip, pıar-menedjer qyzmetine qabyldandym, – dep atap ótti.

Danıar áıgili boksshy Maık Taısonmen suhbattasqan.

– Ómirimdegi mańyzdy materıaldardyń biri – tanymal boksshy Maık Taısonmen bolǵan eksklúzıvti ıntervú der edim. "Orel ı Reshka" baǵdarlamasyn túsirgende de ózim operator, ózim montajer boldym. Onyń mátinin jazýǵa qazaqstandyq jýrnalıs Anar Úmbetova kómektesti. Qazir Anar da Amerıkada turady. Nú-Iork týraly shyǵarylymǵa óte jaqsy lebizder kelip jatyr. Baǵdarlamanyń bas prodúseri Elena Sınelnıkova habarlasyp, alǵys bildirdi. Endi Nú-Iork týraly kelesi shyǵarylymdy ázilep jatyrmyz. Onda halyqtyń koronavırýs ınfeksıasynan jazylǵanyn kórseterimizge úmittenemin, – deıdi Nú-Iorkte jumys isteıtin Qazaqstan azamaty.

Danıar túsken sát vıdeonyń 4 mınýtynan bastalady.