Almaty qalasy ákiminiń orynbasary Erjan Babaqumarov beıne-konferensıa-baılanys rejıminde Ortalyq qalalyq klınıkalyq aýrýhana ujymymen kezdesý ótkizdi.

Jıynǵa Qoǵamdyq densaýlyq saqtaý basqarmasy men Taýarlar men qyzmetterdiń sapasy men qaýipsizdigin baqylaý departamentiniń basshylyǵy qatysty. Kezdesýde Ortalyq qalalyq klınıkalyq aýrýhanaǵa ýaqytsha ornalastyrylǵan dárigerler men medısınalyq qyzmetkerlerdiń máselelerin sheshý joldary qarastyryldy.

Búginde aýrýhana aýmaǵyndaǵy koronavırýstyq ınfeksıanyń oshaǵy aýyzdyqtalyp, birinshi jáne ekinshi deńgeıde baılanys ornatqandar anyqtalǵan. Ortalyq qalalyq klınıkalyq aýrýhananyń basshysy mindetin atqarýshy Marat Abdýllaev ótken táýlikte aýrýhana aýmaǵyndaǵy 316 tulǵadan taldaýlar (analız) ekinshi qaıtara alynǵanyn málimdedi. Búgin taǵy 249 adam qaıta testileýden ótedi.

Sonymen birge, aýrýhananyń bas dárigeri osyǵan deıin aıtylǵan usynystardyń eskerilgenin tilge tıek etti. Eń aldymen emhanada antıseptıkalyq jáne dezınfeksıalyq quraldar artyp, tamaqpen qamtamasyz etý máselesi de sheshimin tapqan. Kezdesýde oftalmologıa bóliminiń meńgerýshisi B. Joldasov, travmotologıa bóliminiń meńgerýshisi B. Erǵalıev, fızıoterapıalyq bólim meńgerýshisi A. Tórequlova, sonymen birge, QazMÚBBÝ travmotologıa jáne ortopedıa kafedrasynyń dosenti K. Orazalıev pen «AGjPǴO» AQ táýelsiz dırektory, azamattyq belsendi A. Áljanova qatysty.

Qala ákiminiń orynbasary Erjan Babaqumarov COVID-19-ǵa test der kezinde alynyp, onyń nátıjesi ár adamǵa ýaqytyly berilý kerektiginiń mańyzdylyǵyn atap ótti. Nátıjesi teris shyqqan dárigerler men medısına qyzmetkerleri arnaıy daıyndalǵan qonaq úı keshenderine ınkýbasıalyq kezeń aıaqtalǵanǵa deıin karantınge jatqyzylady.

– Aýrýhana qyzmetkerlerin qaıta tekserý jáne saraptama nátıjelerin qoldaryna berýge basymdyq berip otyrmyz, – dep atap ótti Erjan Babaqumarov.

Qoǵamdyq densaýlyq saqtaý basqarmasy men Taýarlar men qyzmetterdiń sapasy men qaýipsizdigin baqylaý departamentine birlese otyryp, az ýaqyttyń ishinde bul jumysty aıaqtaýdy tapsyrdy.

Sondaı-aq, Erjan Babaqumarov medısınalyq joǵary oqý oryndary basshylarynyń qatysýymen ótken kezdesýde medısınalyq uıymdarǵa bekitilgen dáriger-rezıdentterdiń eńbek qaýipsizdigin qamtamasyz etý máselelerin kóterdi. Búginde olardyń arasynda koronavırýs ınfeksıasyn juqtyrý jaǵdaılary tirkelgen. Atalǵan naýqastar qazir ınfeksıalyq stasıonarlarda em alýda.

Bul rette naýqastarǵa qoldaý kórsetý, sonyń ishinde psıhologıalyq kómek berý joǵary oqý oryndarynyń rektorlaryna tabystaldy. Qoǵamdyq densaýlyq saqtaý basqarmasyna sapaly medısınalyq qyzmet kórsetýdi qamtamasyz etý boıynsha jan-jaqty sharalar qabyldaý qajettigi tapsyryldy. Búginde atalǵan juqtyrý faktileri boıynsha Taýarlar men qyzmetterdiń sapasy men qaýipsizdigin baqylaý departamentimen epıdemıologıalyq tekserýler júrgizilýde.