Búgin Májilis spıkeri Nurlan Nyǵmatýlınniń tóraǵalyǵymen ótken Májilistiń jalpy otyrysynda «Qazaqstan Respýblıkasynyń saılaý týraly» jáne «Saıası partıalar týraly» zań jobalary qaraldy.

Bul zań jobasy Memleket Basshysynyń Ulttyq qoǵamdyq senim keńesiniń ekinshi otyrysynda bergen tapsyrmalaryn iske asyrý jónindegi is-sharalar josparyna sáıkes ázirlengen bolatyn.

Májilis Tóraǵasy atap ótkendeı, alǵash ret partıalyq saılaý tizimine áıelder men jastarǵa 30%-dyq mindetti kvota qaralyp otyr. Osy rette Nurlan Nyǵmatýlın jastar kvotasyna erekshe nazar aýdardy:

– Shynyn aıtý kerek, bul másele qoǵamda jáne jumys tobynda kóp talqylandy. Birinshiden, kóptegen elderde saılaý kezinde partıalyq tizimde jastarǵa arnalǵan kvota mindetti túrde bekitilgen. Ekinshiden, qaı kezde bolsa da, qandaı qoǵamda bolsa da jastarǵa degen senim óte zor. Árıne, jastardyń ómirlik tájirıbesi azdaý da bolýy múmkin, biraq olardyń zamanǵa saı ıdeıalary, olardyń zamanǵa saı usynystary óte kóp. Qazaq halqy osyndaıda «Asyl – tastan, aqyl – jastan» deıdi. Sondyqtan, menińshe, jastar kvotasy partıalyq tizimde zań boıynsha mindetti túrde bolý kerek. Árıne, 29 jasty bireýler jastaý deıdi, bireýler jasy jetti deıdi, biraq olardyń zamanǵa saı jańa kreatıvti ıdeıalary bar, usynystary bar. Sondyqtan, menińshe, odan qoryqpaýymyz kerek, – dedi Nurlan Nyǵmatýlın.

Sonymen qatar, Májilis Tóraǵasy saıası partıalardy tirkeý úshin  partıa múshesin 40 myńnan 20 myńǵa deıin tómendetýdiń mańyzdylyǵyna toqtalyp, bul normalar áıelder men jastardyń saıasatqa belsendi qatysýyn yntalandyryp qana qoımaı, elimizdiń saıası júıesin jańǵyrtýǵa jańa serpin beretinin atap ótti.