Daǵdarys eń aldymen shaǵyn bıznesti kúıretedi. Osylaısha, jumyssyz qalǵan nemese turaqty tabysynan aıyrylǵandar sany artady. Eger shuǵyl shara qabyldanbasa, Qazaqstanda jumyssyzdyq deńgeıi 4,8 prosentten 13,7 prosentke biraq kóterilýi múmkin, dep habarlaıdy «Habar 24». 

Jumys oryndary men halyqtyń tabysyn saqtap qalýdyń birneshe joly qarastyrylmaq. Aldymen, shaǵyn bıznes qyzmetkerlerine eńbekaqy tóleýdi sýbsıdıalaý usynyldy. Al sýbsıdıaǵa dámeli jumys berýshilerge eńbek kelisim sharttaryn elektrondyq eńbek bırjasy arqyly tirkeý týraly shart engizýi múmkin. Budan bólek, 2020 jyldyń sońyna deıin jalaqysy tómen qyzmetkerler úshin mindetti zeınetaqy jarnalaryn memleketten sýbsıdıalaý usynyldy.

Ózbekstandyq emıgranttardyń 65 % Qazaqstanǵa kóshken

Qazaqstan ózbekstandyqtar qonys aýdarǵan bes eldiń ishinde birinshi orynda tur. Bıyl Ózbekstannan 1906 adam kóship ketken. Olardyń 65 posenti nemese 1234 adam Qazaqstanǵa kelgen. Resmı aqparatqa saı, ekinshi orynda Reseı tur. Ol jaqqa ózbekstandyqtardyń 29 prosenti qonys aýdarǵan. Tizimge Qyrǵyzstan, Izraıl jáne Tájikstan kirdi. Aıta ketý kerek, Izraıl Ózbekstannyń memlekettik statısıka komıtetiniń esepterinde 2018 jyldan bastap turaqty kezdesetin alys sheteldegi jalǵyz memleket.

AQSH kompanıalary munaıdy strategıalyq qorda saqtaı bastady

AQSH-taǵy jekemenshik kompanıalar munaıdy eldiń strategıalyq qor qoımalaryna saqtaı bastady. Sáýirde olar qoımalarǵa 1,1 mıllıon barelge jýyq munaı jetkizgen. Osy aıda AQSH-tyń energetıka mınıstrligi jekemenshik kompanıalarmen kelisim jasady. Oǵan sáıkes, strategıalyq munaı qorynyń qoımalarynda jylyna 23 mln barel saqtaýǵa ruqsat etilgen. Bul kólemniń basym bóligi mamyr jáne maýsym aılarynda jetkiziledi. Ótken aptada AQSH prezıdenti Donald Tramp AQSH munaı baǵasynyń tarıhı quldyraýyn paıdalanyp, ulttyq strategıalyq qorlardy tolyqtyrý úshin 75 mln barel satyp alatynyn málimdedi.

Eldegi jańalyqtarǵa oıyssaq. Qazaqstandyq kompanıalardyń jumyrtqa eksporty 57,5%-ke tómendegen. Saladaǵy óndiris kólemi ótken jyldyń osy kezeńimen salystyrǵanda, shamamen 7%-ke azaıǵan.