«Neke (erli-zaıyptylyq) jáne otbasy týraly» zań kodeksiniń 50-den astam babyna ózgerister engizildi. Olar byltyrǵy jyldyń jeltoqsanynda kúshine engeni málim. Olardy óńirlik QKO ortalyǵynda ótken jıynda oblystyq Ádilet departamentiniń ókilderi túsindirip berdi.
Ózgeristerdiń basty maqsaty - azamattyq hal aktilerin tirkeý tártibin jeńildetý, artyq qujattardy talap etýdi alyp tastaý, memlekettik qyzmetter kórsetý merzimin aıtarlyqtaı qysqartý, balalardyń quqyqtary men múddelerin qorǵaý bolyp tabylady.
«Atap aıtsaq, bala asyrap alýdy jáne áke bolýdy anyqtaýdy memlekettik tirkeýdi, sondaı-aq sot sheshimi negizinde neke buzý sekildi akt jazba túrlerin tirkeý alynyp tastaldy. Mysaly, osy ózgeristerge deıin erli-zaıyptylar sot arqyly nekesin buzyp, sodan keıin AHAT organdaryna baryp kýálik alýy qajet bolsa, ózgeristerge sáıkes sot sheshimi zańdy kúshine engen sátten, avtomatty túrde neke qıý týraly akt jazbasyna nekeniń buzylǵany týraly belgi qoıylyp, kýálik alýdyń qajettiligi alynyp tastaldy» - deıdi departament basshysy Darıǵa Kesikbaeva.
Budan bylaı azamattarǵa jergilikti AHAT organdaryna barýdyń qajeti joq. Sonymen qatar, buryn balany asyrap alǵan nemese ákelik anyqtalǵan kezde balaǵa eki kýálik beriletin - asyrap alý ne áke bolýdy anyqtaý jáne týý týraly kýálik.
Jańa ózgeristerge sáıkes artyq qujattardy joıý maqsatynda azamattar úshin de, tirkeýshi organ úshin de tártipti jeńildetý arqyly balaǵa qajetti tek týý týraly kýálik beriledi. Bul rette balanyń jáne ata-anasy týraly derekter týý týraly kýálikte ǵana kórsetiledi.
Kelesi ózgeristerdiń biri - azamattarǵa yńǵaıly bolý úshin azamattyq hal aktilerin tirkeýdiń barlyq túrlerin tirkeý, olarǵa ózgerister, túzetýler men tolyqtyrýlar engizý, akt jazbalardy qalpyna keltirý jáne joıý, qaıtalama kýálikter men anyqtamalar alý boıynsha memlekettik qyzmetter eksaýmaqtyq qaǵıdat boıynsha kórsetiledi.
«Mysaly, qujattaryn joǵaltqan jaǵdaıda, azamat qaı aımaqta turatyna, týǵan jerine qaramastan, kez-kelgen tirkeýshi organǵa baryp, qaıtalama týý týraly kýáligin ala alady. Jáne de azamattardan aqparattyq júıelerden alýǵa bolatyn sot sheshimderi, medısınalyq anyqtamalar, el aýmaǵynda tirkelgen aktiler týraly aqparat memlekettik organdarǵa usyný qajettiligi joıyldy. Ata-analardyń tańdaýy boıynsha SMS-habarlama arqyly týýdy proaktıvti jolmen tirkeý múmkindigi zańnamalyq túrde retteldi» - deıdi D.Kesikbaeva.
Sonymen qatar bala perzenthanada týylsa, anasynyń jeke basyn kýálandyratyn qujatynyń bolmaýyna qaramastan, nárestege mindetti túrde týý týraly kýálik beriledi.
