Almaty qalasynyń bas memlekettik sanıtarlyq dárigeriniń qaýlysy boıynsha karantın jaǵdaıyndaǵy qaýipterdi azaıtý maqsatynda karantın kezeńinde balalar alańdaryna, baý-baqshalarǵa barý sharttary reglamentteldi. Bul týraly ákimdiktiń baspasóz qyzmeti habarlady. 

Qujatqa sáıkes, halyqtyń balalar alańdary men aýlalarǵa qoljetimdiligi saǵat 5:00-den 21:00-ge deıin ruqsat etilgen. Balalar alańdary men aýlalar aýmaǵyna zalalsyzdandyrý jumystary júrgiziletin bolady. Barlyq qoljetimdi jerlerde, eń aldymen habarlandyrý taqtalarynda karantındik tártipti saqtaý sheńberinde talap etiletin jeke jáne zańdy tulǵalar úshin shekteýlerdiń barlyq túrleri týraly eskertpeler ornalastyrylady.

Almaty qalasynyń turǵyndary balalar alańdary men aýlalarǵa, baý-baqsha, saıajaılarǵa barǵan kezde 2 metrden kem emes aralyqta áleýmettik qashyqtyqty saqtaýy qajet. Otbasy múshelerin qospaǵanda, úsh adamnan astam adamnyń jınalýyna tyıym salynyp, basqa turǵyndarmen dene baılanysyn barynsha boldyrmaýǵa, ózimen birge jeke qorǵaný quraldaryn alyp júrýge jáne kıý erejelerin saqtaý talap etiledi.

Óz kezeginde, quqyq qorǵaý organdarynyń qyzmetkerleri engizilgen sharalardy oryndaý boıynsha kóshelerdi, aýla alańdary men jalpy paıdalaný oryndaryn táýlik boıy patrúldeýdi qamtamasyz etedi.