Tótenshe jaǵdaı men karantınge baılanysty tabysynan aıyrylǵan azamattar men halyqtyń áleýmettik osal toptaryna taǵaıyndalǵan áleýmettik tólem kimge jáne qandaı mólsherde berilgeni belgili boldy. Bul týraly Almaty qalasy áleýmettik ál-aýqat basqarmasynyń basshysy Rahat Shımasheva keńinen túsindirip berdi.

– Tótenshe jaǵdaıǵa baılanysty tabysyn joǵaltqan azamattarǵa beriletin 42 500 teńgeni júzege asyrý erejeleri qandaı ekenin túsindirý úshin buǵan deıin birneshe ret brıfıńter ótkizildi. Almaty boıynsha júıege jalpy 896 752 ótinish kelip tústi. Onyń ishinde 416 045 adamǵa somasy 17,5 mlrd teńge bolatyn áleýmettik kómek taǵaıyndaldy. Birinshi aıda ony 370 660 adam alsa, ekinshi aıda 45 385 adamǵa berildi, – dedi R. Shımasheva.

Baqylaý jáne tekseris nátıjesinde talaptarǵa saı kelmeıtin 471 myń ótinish qabyldanbaǵan.

Tólemderdi taǵaıyndaýdan bas tartý sebepteri mynadaı:

– tótenshe jaǵdaı jarıalanǵannan buryn sońǵy 12 aıda áleýmettik aýdarymdardyń/biryńǵaı jıyntyq tólem/mindetti zeınetaqy jarnalarynyń bolmaýy, eger BJT ótinish berý kúnine deıin tólengen bolsa (68%);
– ótinish berýshi – áleýmettik tólemder memleketke tıesili kásiporyndar, uıymdar, mekemeler júrgizetin jáne memlekettik organdar basqaratyn tulǵa (5,8%);
– BJT tóleýshisi, alǵashqy tólem tótenshe jaǵdaı kezinde tólenip (2020 jyldyń 16 naýryzynan bastap), sonymen qatar tólemder men járdemaqylar alýshylar (20%);
– ekiden astam tóleýshilerden mindetti áleýmettik aýdarymdar (mindetti zeınetaqy jarnalary nemese biryńǵaı jıyntyq tólem) jasalǵan, onyń ishinde bir kezeńge ózderi úshin tólegender (6%);
– t.b. (QR shyqqandar, alýshynyń qaıtys bolýy) (0,2%).
– Áleýmettik tólemderdi júzege asyrý erejesine sáıkes (Eńbek mınıstriniń 2020 jylǵy 26 naýryzdaǵy №110 Buıryǵy) Basqarma qabyldaǵan qujattar shtabpen óńdelip, Memlekettik korporasıaǵa, sodan keıin tólem júrgizý úshin Memlekettik áleýmettik saqtandyrý qoryna jiberiledi, – dedi spıker.

Brıfıń kezinde basqarma basshysy «Jańa Alataý» qory esebinen azyq-túlik jıyntyqtarymen qamtamasyz etilgen azamattar jaıly da aıtyp ótti.

– Barlyq muqtaj sanattardy esepke alǵanda azyq-túlik sebetin 12 797 adam aldy. Onyń ishinde 2481 jalǵyzbasty zeınetker bolsa, 5443 adam AÁK alýshylar, al qalǵan 4873 adam baılanys ortalyǵy arqyly belgili bolǵan muqtaj azamattar, – dedi R. Shımasheva.

Aıta keteıik, tótenshe jaǵdaı kezinde 2 aılyq eseptik kórsetkish, ıaǵnı 5567 tg kóleminde áleýmettik kómek 352,1 mln tg esebinde 63,2 myń adamǵa berildi.

 

Olardyń ishinde:
– 1, 2 toptaǵy múgedekter – 17 128 adam, 95,4 mln tg;
– múgedek-bala – 6577 adam, 36,7 mln tg;
– múgedek balany kútýmen aınalysatyn ata-analar – 6185 adam, 34,6 mln;
– AÁK alýshylar sanynan 6 jastan 18 jasqa deıingi balalar – 6699 adam, 37,3 mln;
– AÁK eresek alýshylary – 7580 adam, 42,2 mln;
– 3 toptaǵy múgedekter – 10 253 adam, 57,1 mln;
– resmı túrde tirkelgen jumyssyzdar – 8800 adam, 48,9 mln tg kómek aldy.