Qala ákimdiginiń baspasóz ortalyǵynda Almaty qalasy ákiminiń birinshi orynbasary Erlan Qojaǵapanovtyń qatysýymen onlaın brıfıń ótti. Onda ol turǵyndardan jıi kelip túsetin suraqtarǵa jaýap berdi. Bul týraly qala ákimdiginiń baspasóz qyzmeti habarlady.

Almatylyqtar «Qalanyń basqa aımaǵynda turatyn qart týystarǵa kómektesýge bola ma?» degen suraqty jıi qoıady eken. Qala ákiminiń birinshi orynbasary mundaı jaǵdaılarda azamattarǵa qart jáne kútimdi kerek etetin týystaryn karantın ýaqytynda óz úıine kóshirý usynylatynyn jetkizdi. Qazir egde jastaǵy adamdar erekshe qorǵaýdy qajet etedi. Óıtkeni, olardyń ımýnıteti álsiz.

– Sondyqtan qajet nárseniń bárin satyp alyp, karantınniń sońyna deıin qart adamdardyń janynda bolý kerek, olardyń basqalarmen baılanysyn azaıtqan durys. Eger bul múmkin bolmasa, qalada muqtaj adamdarǵa kómek kórsetetin eriktiler shtaby jumys isteıdi. Eriktiler shtabynyń telefony – 279-1691, – dedi qala ákiminiń birinshi orynbasary.

– Adamdar úıden qanshalyqty alys ketkenin qalaı anyqtaıdy? Sebebi, kóp adamdar tirkelgen meken-jaıda turmaıdy ǵoı» degen saýalǵa: «Sizdiń turatyn jerińiz ben qozǵalatyn jerińiz arasyndaǵy qashyqtyq elektrondy karta jáne qala turǵyndary keńinen paıdalanatyn qosymshalar arqyly ólshenedi. Tirkeýge keler bolsaq, siz qazirgi tańda naqty turatyn jerińizge onlaın rejıminde ýaqytsha tirkele alasyz, – dep jaýap berdi Erlan Toqtarhanuly.