Taýarlar men qyzmetter sapasyn jáne qaýipsizdigin baqylaý departamentiniń basshysy Aızat Moldaǵasymova Almatyda 13 myńnan astam adam COVID-19 indetine tekserilgenin málimdedi. Bul týraly qala ákimdiginiń baspasóz qyzmeti habarlady.

– Sońǵy bir táýliktiń ishinde indetti juqtyrýdyń jańa eki jaǵdaıy anyqtaldy. Ekeýi de indetti naýqas adamdarmen baılanysta bolyp juqtyrǵan. Jalpy stasıonarlyq karantınde 877 naýqas, úı karantıninde 5217 adam jatyr. Juqpaly aýrýlar aýrýhanasynda – 211, provızorlarda – 301 jáne karantındik gospıtáldarda – 388, – dedi spıker .

Qaýipti indetti juqtyrǵan 121 naýqastyń ishinde 65%-y syrqat adammen baılanysta bolǵandar. Al 5%-y jergilikti, 30%-y indetti syrttan ákelgender eken.

Keshegi kúni qosymsha 813 adam PSR ádisi boıynsha testileýden ótti. Jalpy búgingi kúnge deıin Almatyda 13 myńnan astam adam COVID-19 indetine tekserildi.

– Kúni keshe QR Densaýlyq saqtaý mınıstrligi Almaty qalasy úshin qosymsha 55-ten astam jańa test jiberdi. Bul PSR dıagnostıkadan ótýge tıis naýqastarǵa qajet, – dedi A. Moldaǵasymova.

Spıker Almatyda COVID-19 indetine tekseriletin adamdar qatarynyń keńeıgenin de tilge tıek etti. Buǵan deıin aıtylǵandaı, ókpe qabynýy jáne JRVI-diń aýyr túrimen stasıonarǵa keletin naýqastardyń barlyǵy koronavırýs ınfeksıasyna tekserilýde.

– Budan ózge Ulttyq gvardıanyń, Qorǵanys mınıstrliginiń qyzmetkerleri, polıseıler, áskerı qyzmetshiler men blok-bekettegi memlekettik organdardyń qyzmetkerleri de tekserilmek. Sondaı-aq sanepıdemılogıalyq qyzmettiń 179 qyzmetkeri – dárigerler, medbıkeler de koronavırýstyq ınfeksıaǵa tekserýden ótti, – dedi A. Moldaǵasymova.

Jıyn sońynda karantın tártibiniń mańyzdylyǵyna toqtalǵan spıker:

– Karantın kezinde indet tez taralmaıdy. Iaǵnı, juqtyrý yqtımaldyǵy da soǵurlym az bolady, – dep atap ótti.