Taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaǵasymova Almatyda COVID-19 ınfeksıasyna tekserilý kontıngenti keńeıtilgenin málimdedi. Bul týraly qala ákimdiginiń baspasóz qyzmeti habarlady.

– Qazirgi tańda biz koronavırýstyq ınfeksıanyń beleń alyp ketpeýi úshin, qaýipti indet boıynsha tekseriletin adamdardyń kontıngentin keńeıttik. Sonyń nátıjesinde aýrýdy juqtyrǵan naýqastardy ýaqyt ozdyrmaı der shaǵynda anyqtap, oqshaýlaýǵa múmkindik týyp otyr. Qazir bank qyzmetkerleri, bazarlarda turatyn adamdar, quqyq qorǵaý organdarynyń ókilderi de tekserýden ótedi.

Búgingi tańda Qurlyq áskerleri áskerı ınstıtýtynyń 383 qyzmetkeri tekserildi. Sondaı-aq, "Juldyz", "Jasyl bazar", "Magným" saýda oryndarynyń ókilderi arasynda da medısınalyq tekserý jalǵasýda. COVID-19-dy anyqtaý maqsatynda jappaı tekserilý qaladaǵy koronavırýstyq ınfeksıanyń jasyryn oshaqtaryn anyqtaýǵa kómektesedi, – dedi A. Moldaǵasymova.

Spıkerdiń sózine súıensek, Almatyda bir kúnde COVID-19 ınfeksıasyna 1064 adam tekserýden ótti.