Almatyda oraza kezinde aýyzashar úshin muqtaj jandar men kópbalaly otbasylarǵa tamaqty úılerine jetkizip berýge bolady. Bul týraly qala ákimdiginiń baspasóz qyzmeti málimdedi.

Ramazan aıynda oraza tutqan baýyrlarymyz óz úıinde aýyz ashqany durys. Al muqtaj jandar men kópbalaly otbasylarǵa aýyz ashtyrǵysy keletin azamattar bolsa, olardyń bul saýapty isi de tek karantın talaptaryna saı júrgiziledi. Almaty qalasynyń bas ımamy Erkinbek Shoqaı onlaın rejımde ótken brıfıńte osylaı málimdedi.

Karantınge baılanysty elimizde ýaqytsha jıyn-toılar ótkizýge, as berýge, adamdardyń shoǵyrlanýyna, tipti, meshitterde jamaǵat bolyp qulshylyq etýge ýaqytsha tyıym salyndy. Árıne, bul azamattarymyzdyń densaýlyǵyn saqtaý men juqpaly indetti aýyzdyqtaý úshin jasalǵan sheshim.

– Bas múftı Naýryzbaı qajy Taǵanuly juqpaly indettiń taralýynyń aldyn alý maqsatynda taraýyq namazy meshitterde jamaǵatpen oqylmaıtynyn jáne meshitterde, dámhanalarda, qoǵamdyq oryndarda, t.b. mekemelerde jınalyp aýyzashar berýge ýaqytsha bolmaıtynyn jetkizdi. Sondyqtan qasıetti Ramazan aıynda oraza tutqan baýyrlarymyz óz úıinde aýyz ashqany durys, – dedi E. Shoqaı.

Eger buǵan deıingi Ramazan aılarynda aýyzashardy jyl saıyn meshitterdiń janynda, meıramhanalar men úıge qonaq shaqyryp uıymdastyrǵan bolsaq, bıylǵy orazada bul isterge ruqsat joq.

Aýyzashardy tek úıde ǵana ótkizip, taraýyq namazy da úıde oqylady. Al muqtaj jandar men kópbalaly otbasylarǵa aýyz ashtyrǵysy keletin azamattar bolsa, olardyń bul saýapty isi de tek karantın talaptaryna saı júrgizilmekshi.

– Alla elshisi «kimde kim oraza ustaǵan kisige aýyz ashtyrar bolsa, oraza ustaǵandaı saýap alady. Biraq oraza ustaǵannyń saýaby kemimeıdi» degen. Osy dástúrdi biz osy karantınge deıin jyl saıyn meshitterdiń janynda, meıramhanalar men úıde uıymdastyratynbyz. Biraq bıylǵy jylǵy karantındik talaptar bulardyń bireýine de múmkindik bermeı otyr. Alaıda saýaptan qur qalǵysy kelmegen qaıyrymdy jandar bizde óte kóp. Solardyń nıetin biz karantındik talaptyń sheńberinde jasaımyz. Iaǵnı arnaıy meıramhanalarǵa tapsyrys berý arqyly muqtaj jandar men kópbalaly otbasylardyń úılerine tamaq jetkizip berý qyzmetine júgine otyryp, uıymdastyrsaq degen nıetimiz bar. Árıne, munyń bári sol azamattardyń múmkindigine qaraı uıymdastyrylady, – dedi Erkinbek Shoqaı.

Eskerte keteıik, bıyl 19 mamyrdan 20 mamyrǵa qaraǵan tún – qasıetti Qadir túni.