Áskerde júrgenine bir jyl bolyp qoıǵan merzimdi áskerı qyzmetshiler Tótenshe jaǵdaı rejımi alynǵannan keıin ǵana zapasqa shyǵarylady. Bul týraly QR Qarýly kúshteri Bas shtabynyń uıymdastyrý, jumyldyrý jumystary departamentiniń bastysy Sáken Júsipov málim etti, dep habarlaıdy QazAqparat.

– Azamattardy áskerge shaqyrý tótenshe jaǵdaı rejımi alynǵannan keıin qaıta júrgiziledi. 31 tamyzǵa deıin uzartylady. 2019 jyly kóktemde áskerge shaqyrylǵan áskerı qyzmetshiler zapasqa shyǵarý – tótenshe jaǵdaı rejımi alynǵan jaǵdaıǵa, osy jyldyń 30 maýsymyna deıin júrgiziletin bolady. Bul rette áskerı shaqyrý men zapasqa shyǵarý qoldanystaǵy zańnamaǵa sáıkes iske asyrylady. Eleýli ózgeris bolmaıdy, – dedi Sáken Júsipov OKQ-da onlaın-rejımde ótken baspasóz máslıhatynda.

Sondaı-aq memleket basshysynyń jarlyǵymen azamattardy merzimdi áskerı qyzmetke shaqyrý merzimi 2020 jyldyń maýsymynan tamyzyna aýystyrylyp otyr.