Túrkistan oblysynyń eldi mekenderin sý basýǵa qatysty ózbek tarapyna QR Syrtqy ister mınıstrligi narazylyq notasyn jibermeıdi. Bul týraly QR SİM-niń resmı ókili Aıbek Smadıarov aıtty. 

«Ózbekstan Respýblıkasy aýmaǵyndaǵy Sardoba sý qoımasy bógetiniń buzylýy jáne onyń saldarynan Túrkistan oblysynyń birqatar eldi mekenderin sý basý boıynsha jaǵdaı bizdiń Úkimettiń erekshe baqylaýynda.  2 mamyrda Qazaqstan prezıdenti Qasym-Jomart Toqaev Ózbekstan prezıdenti Shavkat Mırzıóevpen telefon arqyly sóıleskeni jáne suhbat barysynda taraptar oryn alǵan jaǵdaıdy naqty talqylap, eki el úkimeti úılesimdi jumys atqaratyny týraly ýaǵdalasqany málim. Sý basý saldaryn birlesip joıý boıynsha úkimet pen shekaralas óńirler basshylarynyń tyǵyz ózara is-qımylyn nazarǵa ala otyryp, ózbek tarapyna QR Syrtqy ister mınıstrliginiń notasyn joldaý máselesi qarastyrylmaıdy», - dedi Aıbek Smadıarov.

Resmı ókildiń aıtýynsha, Túrkistan oblysynyń ákimi Ómirzaq Shókeev Ózbekstannyń kórshiles óńirlerine jedel túrde sapar jasaǵan. Ózbek tarapymen qajetti kelissózder júrgizip, onyń qorytyndylary týraly Úkimettiń búgingi otyrysynda baıandady.

«Ózderińizge málim, premer-mınıstrdiń orynbasary Roman Sklár bastaǵan Úkimettik komısıa quryldy. Erteń ol Túrkistan oblysy men Ózbekstanǵa birlesken is-qımyl algorıtmin pysyqtaý úshin barady. Eki taraptyń barlyq baılanystary tolyqtaı Máńgilik dostyq jáne strategıalyq áriptestik týraly sharttardyń jáne transshekaralyq sý aǵyndary men halyqaralyq kólderdi qorǵaý jáne paıdalaný jónindegi konvensıanyń normalaryna sáıkes júzege asyrylady», - dedi SİM ókili.