Almatyda qala ákimi Baqytjan Saǵyntaevtyń tóraǵalyǵymen Sybaılas jemqorlyqqa qarsy is-qımyl máseleleri boıynsha onlaın-keńes ótti. Bul týraly qala ákimdiginiń baspasóz qyzmeti habarlady.

Keńeske Almaty qalasynyń Sybaılas jemqorlyqqa qarsy qyzmetiniń basshysy Nyǵmedjan Saparov jáne jergilikti atqarýshy organdardyń basshylary qatysty.

Sybaılas jemqorlyqqa qarsy vedomstvo basshysy qol astyndaǵy basshylar arasynda sybaılas jemqorlyqqa qarsy kúres jaýapkershiligin arttyrý, sybaılastyq áreketter úshin tıisti sharalar qoldanbaı jatqandyǵy turǵysynda baıandama jasady.

Keńes barysynda, sondaı-aq, memlekettik organdardyń ashyqtyǵy men eseptiligi, ashyq búdjetterdiń publicbudget.kz ınteraktıvti kartasyn iske asyrý máseleleri, memlekettik satyp alý kezinde baǵany kóterý derekterin anyqtap, búdjet qarajatyn maqsatsyz paıdalanýdy jáne «Biryńǵaı satyp alý terezesi» aqparattyq-taldaý júıesi arqyly jymqyrý boldyrmaý týraly aıtyldy.

Keńes qorytyndysy boıynsha qala ákimi Baqytjan Saǵyntaev barlyq memlekettik organdardyń basshylaryna sybaılas jemqorlyqqa qarsy is-qımyl zańnamasyn qatań saqtaýdy eskertti jáne birqatar naqty tapsyrmalar berdi.

Memlekettik organdardyń basshylaryna qyzmettiń ashyqtyǵy men aıqyndylyǵyn arttyrý, ınteraktıvti kartany odan ári iske asyrý boıynsha baqylaý júrgizý, memlekettik satyp alýdy ótkizý boıynsha jumysty jandandyrý, sondaı-aq, sybaılas jemqorlyqqa qarsy is-qımyl boıynsha keshendi sharalar ázirleý usynyldy.