Búgin Májilis Spıkeri Nurlan Nyǵmatýlınniń tóraǵalyǵymen Palatanyń jalpy otyrysy ótti. Onda depýtattardyń ózderi bastamashy bolǵan parlamenttik opozısıa týraly zań jobasy maquldandy.

Májilis Tóraǵasy atap ótkendeı, qujat jobasy Memleket Basshysy Qasym-Jomart Toqaevtyń tapsyrmasymen ázirlendi.

– Osyǵan oraı, Májilis depýtattary bastamashy bolǵan osy zań jobasynda alǵash ret «parlamenttik opozısıa» degen uǵym engizildi. Bul Parlament tarıhynda buryn bolmaǵan, biraq ta, ýaqyt talabyna saı jasalyp otyrǵan óte qajetti qadam. Sebebi, Parlamenttik opozısıa – demokratıany odan ári nyǵaıtýǵa, Parlament jumysyn damytýǵa, sonymen birge, ashyq jáne erkin qoǵamdy qamtamasyz etýge yqpal etetin bolady. Sondyqtan damyǵan elderdiń tájirıbesin eskere otyryp, osy zań aıasynda, tıimdi parlamenttik opozısıa qalyptastyrý kerek dep esepteımiz, – dedi Nurlan Nyǵmatýlın.

Osy zań jobasy boıynsha depýtattar birqatar túzetýler engizdi. Túzetýlerge sáıkes parlamenttik opozısıa Parlament Májilisi turaqty komıtetteriniń hatshylary laýazymyna kandıdatýra usynýǵa da quqyly bolady. Bul rette, eki turaqty komıtettiń hatshylary parlamenttik opozısıa usynǵan depýtattar arasynan saılanady.

Buǵan qosa, quqyqtyq olqylyqtardy bolǵyzbaý, zań jobasynyń normalaryn bir-birine jáne basqa zańnamalyq aktilerge sáıkes keltirý maqsatynda redaksıalyq, naqtylaýshy sıpattaǵy túzetýler engizildi.

Talqylaýdy qorytyndylaǵan Májilis Tóraǵasy osy zań jobasy jáne ony is júzinde qoldaný azamattardyń, jalpy alǵanda qoǵam múddesi aıasynda jetildirilip otyratynyn aıtty.

Zań jobasynyń negizgi maqsaty – parlamenttik opozısıa ınstıtýtyn qalyptastyrýdy retteý salasynda quqyqtyq negizderdi qamtamasyz etý.

Májilistiń Baspasóz qyzmeti