Aıtysker aqyn Rınat Zaıytov İnstagram paraqshasynda Túrkistan oblysy Maqtaaral aýdanyndaǵy eldi mekenderdi sý basýy basshylyqtyń nemquraılylyǵynyń saldary ekenin aıtty.
"Kóktem kele salysymen jylda halqymyz jadyrap, jaınap kúlýdiń ornyna sý astynda qalyp, zar jylap, sharasyz shýlaıtyny bizdiń elde ádetti jaǵdaıǵa aınalyp bara jatqandaı. Jylda Qazaqstannyń áıteýir bir-eki óńiri sýǵa batady da jatady. Halyq aqsha jınaıdy, biz jubatý sózin aıtyp, sabyrǵa shaqyramyz. Jyl saıyn osy. Nege? Sebebi bireý, basshylyqqa báribir. Mine osy arsyzdardyń nemquraılylyǵynyń zardabyn jazyqsyz halyq tartady da jatady.
Áıtpese, sol Maqtaraldyń halqyn aldyn ala nege eskertip, nege kóshirýge járdem bermedi? Átteń... tistenip otyryp jazý jazýdan, belsendi topqa azǵantaı tıyn aýdarýdan basqa qolymyzdan túk kelmeıdi... Eı, arsyzdar oılansańdarshy.
Jylda sýda qalyp jatyrmyz ǵoı. Qashan áreket jasaısyńdar? Kelesi qaı oblys?
Eń bolmasa sony erterek eskertip aıtyńdar.
"Ǵajappyz"- dep jylda aıtqanmen atamyz:
Bir apatqa jylda ushyrap jatamyz.
Qys kelgende jylý tappaı úılerge,
Kóktem kelse topan sýǵa batamyz.
Jemirlerge basty ýaıym óz basy,
Belgili ǵoı halyqqa qol sozbasy.
Eı ákimder, bul jaı ǵana sý emes,
Bul jazyqsyz halqymyzdyń kóz jasy!", – dep jazdy aqyn.
Pikir qaldyrý