QR Premer-Mınıstriniń orynbasary Roman Sklár Maqtaaral aýdanynda boldy. Roman Sklár sý alǵan aýyl turǵyndarymen kezdesip, olarǵa Memleket Basshysy Qasym-Jomart Toqaevtyń sálemin jetkizdi.

"Qazaqstan Prezıdenti Maqtaaral aýdanynyń sýdan zardap shekken birde - bir turǵyny kómeksiz qalmaıdy, dedi. Sol sebepti, sizderge tek túsiniktik tanytýdy suraımyn. Úkimet tarapynan barlyq qajetti kómek kórsetiledi. Prezıdent Úkimetke Ózbekstandaǵy sý qoımasy bógetiniń buzylýy saldarynan sý basqan aýyldardyń turǵyndaryna jan-jaqty materıaldyq kómek kórsetýdi tapsyrdy",- dedi Premer-mınıstrdiń orynbasary Roman Sklár.

Oryn alǵan jaıtqa baılanysty arnaıy úkimettik komısıa qurylǵany belgili. Ony Premer-Mınıstrdiń orynbasary Roman Sklár basqarady. Túrkistan oblysynyń ákimi Ómirzaq Shókeev pen quramynda ortalyq jáne jergilikti atqarýshy organdardyń basshylary bar jumys toby Jańa turmys, Jeńis, Fırdoýısı, Órgebas, Dostyq aýyldarynyń turǵyndarymen kezdesti.

Komısıa kelgen shyǵyndy shuǵyl túrde esepteý boıynsha jumystardy júrgizedi. Eń aldymen turǵyn úıler qalpyna keltiriledi. Sonymen qatar, ınjenerlik, kólik, áleýmettik ınfraqurylym qolǵa alynady.

Komısıa arnaıy tehnıka ákelgen Ózbekstan memleketiniń ókilderimen de kezdesti. Sý astynda qalǵan aýyldardy tazalaýǵa kórshi elden kómekke kelgen 50-ge jýyq tehnıka jumyldyryldy.

Túrkistan oblysy ákiminiń baspasóz qyzmeti