Almaty qalasynyń ákimi Baqytjan Saǵyntaevtyń tapsyrmasyn oryndaý aıasynda, sondaı-aq, Densaýlyq saqtaý mınıstri Eljan Birtanov belgilegen medısınalyq qaýymdastyqpen ózara árekettestik júıesin qurý jónindegi nusqaýyna sáıkes shahar basshysynyń orynbasary Erjan Babaqumarovtyń basshylyǵymen Almaty qalasynyń Qoǵamdyq medısınalyq keńesi quryldy (AQMK).

Keńestiń quramyna medısınalyq qaýymdastyqtardyń shamamen 140 jetekshi profıldi sarapshylary men ókilderi endi. Olardyń qatarynda azamattyq belsendi, «AGjPǴO» AQ táýelsiz dırektory Aıda Áljanova, TRIZ-fasılıtator, halyqaralyq akredıtasıalanǵan medıator Irına Vıgovskaıa, «Almaty klınıkalary qaýymdastyǵy» JKjZTB atqarýshy dırektory Rasýl Dúısenov, Qazaqstandyq reprodkýtıvti medısına qaýymdastyǵynyń prezıdenti, joǵary sanatty akýsher-gınekolog dáriger Vácheslav Lokshın, A.N.Syzǵanov atyndaǵy «Ulttyq ǵylymı hırýrgıa ortalyǵy» AQ basqarmasynyń tóraǵasy Bolatbek Baımahanov, sonymen birge, respýblıkalyq medısınalyq ortalyqtardyń, memlekettik jáne jekemenshik uıymdardyń, medısınalyq ýnıversıtetterdiń, qalalyq densaýlyq saqtaý basqarmasy men taýarlar men qyzmetterdiń sapasyn baqylaý departamentiniń ókilderi bar.

Keńestiń mindeti – aǵymdaǵy jaǵdaıǵa taldaý jasaı otyryp, Almaty qalasynyń densaýlyq saqtaý júıesin damytý boıynsha sharalardy jasap shyǵarý. Keńes qurylymynda kelesideı baǵyttar boıynsha úsh jumys toby qurylǵan: dárigerlerdiń vırýsty juqtyrýyn boldyrmaý, qazirgi shynaıy jaǵdaıdaǵy medısına uıymdarynyń jumysy, Almaty qalasynda densaýlyq saqtaý júıesiniń postkrızıstik damý strategıasy.

«Memleket basshysy atap ótkendeı, aldaǵy (bolashaqtaǵy) daǵdarysqa daıyndyqty qamtamasyz etýde densaýlyq saqtaý júıesin jańǵyrtyp, qoıylǵan mindetterdiń basymdyǵyn qaıta qaraý úshin jańa bastamalardy qolǵa alýymyz kerek. Qoǵamdyq medısınalyq keńestiń maqsaty – Almaty qalasy densaýlyq saqtaý júıeisiniń postkrızıstik damýy úshin qajetti sharalar paketin jasap shyǵarý. Jańa tásilder medısınalyq qyzmet kórsetýdiń joǵary sapasyn qamtamasyz etýge, qalalyq medısınalyq qoǵamdastyqtyń azamattardyń densaýlyǵyna qatysty jaǵdaılarda tez áreket etýge,sonymen birge, áldeqaıda keń taraıtyn aýrý túrlerine qaraı baǵyttalatyn bolady», - dep atap ótti E.Babaqumarov.

Kezdesý barysynda medısına qyzmetkerleriniń eńbek qaýipsizdigin qamtamasyz etý jáne olardyń koronavırýs ınfeksıasyn juqtyrý qaýpinen qorǵaý tásilderi qarastyryldy. Jekeleı alǵanda, medısına qyzmetkerleriniń jeke qorǵanysh quraldary sapaly testtermen qamtylýyn jáne koronavırýsty tekserýde zerthanalyq zertteýlerdi jaqsartý jaıy da sóz boldy. Keńes músheleri tarapynan memlekettik jáne jekemenshik medısınalyq uıymdardyń jumys tıimdiligin arttyrý, jumys barysyn jetildirý, medısınalyq qyzmetterge qoljetimdilikti arttyrý, halyqpen jáne qalanyń ishki medısınalyq qoǵamdastyqtarymen baılanysty jaqsartý, sondaı-aq, otandyq medısınaǵa degen halyqtyń senimin arttyrý jóninde birqatar usynystar aıtyldy. 

«Búgingi tańda medısınalyq qyzmetkerleri stresti jaǵdaıda jáne olarǵa artylǵan júk aýyr bolyp otyr. Sol sebepti medısına mekemeleriniń barlyq qyzmetkerlerine arnap qashyqtyqtan streske qarsy baǵdarlama jasaý usynysy bar. Bul salada bizde aıtýy mamandarymyz da bar», - dedi TRIZ-fasılıtator, halyqaralyq akredıtasıalanǵan medıator Irına Vıgovskaıa. 

«Almaty klınıkalary qaýymdastyǵy» JKjZTB atqarýshy dırektory Rasýl Dúısenov medısına qyzmetkerleriniń vırýs juqtyrý jaǵdaıyn taldaýǵa jiti nazar aýdardy. Bul eńbek qaýipsizdigin qamtamasyz etý jóninde jańa ádisterdi jasaýda, sonymen birge dárigerler arasynda jańadan juqtyrý jaǵdaıyn boldyrmaý úshin kerek.

Óz kezeginde azamattyq belsendi Aıda Áljanova bul bastamanyń Keńes quramyndaǵy árbir músheniń osy iske belsendi qatysýyn qajet etetin, durys ujymdyq sheshim qabyldaýǵa uıytqy bolatyn fasılıtasıa tehnologıasyn qoldana otyryp jasalatyn jańa jumys formaty ekendigin atap ótti.

Barlyq usynystar júıege keltirilip, egjeı-tegjeıli túrde tekseriledi. Olardyń negizinde qalanyń medısınalyq uıymdaryna arnap daǵdarys kezinde jáne odan keıingi kezeń úshin strategıa qurylmaq.

Otyrys qorytyndysy boıynsha Almaty qalasy ákiminiń orynbasary Erjan Babaqumarov Keńestiń ınstıtýttandyrylatynyn jáne onyń tek koronavırýs ınfeksıasymen kúresý sharalaryn júrgizýmen ǵana emes, karantın aıaqtalǵannan keıin de jumysyn jalǵastyratynyn atap ótti.

«Qoǵamdyq keńes medısınalyq qoǵamdastyqpen dıalog qurýdyń yqpaldy tetigine aınalady. Keńestiń qatysýymen tájirıbede júzege asyrýǵa usynylatyn qorytyndy qujattar jasalady», - dep atap ótti E.Babaqumarov.