Maıdan qatysýshylary men tyl eńbekkerleriniń merekelik beınesújetteri áleýmettik jelilerge ornalastyrylǵan.

Uly Otan soǵysynyń qaharmandary otandastaryn Jeńis kúnimen quttyqtap, soǵysta qaza tapqan batyr baýyrlaryn da eske alyp, barsha qazaqstandyqqa zor densaýlyq, beıbit kúnder tilep, elimizdiń odan ári órkendeı berýine iltıpattaryn bildirdi.

15-ten astam ardager quttyqtaý sóz sóıledi. Olardyń qatarynda:

- Ońtústik-Batys maıdanyndaǵy urys qımyldaryna, Stalıngrad shaıqasyna, Kýrsk doǵasyndaǵy shaıqasqa, Dneprdi basyp ótýge, Ýkraınany, Polshany, Chehoslovakıany, Pragany azat etýge, Berlın shabýylyna qatysqan, Qarýly Kúshter sapynda 43 jyl qyzmet etken, 5 orden jáne 35 medalmen, sonyń ishinde Polshanyń, Chehoslovakıanyń, Rýmynıanyń, Ýkraınanyń, Monǵolıanyń memlekettik nagradalarymen marapattalǵan – Leonıd Gırsh;

- 47-shi atqyshtar polkiniń, 15-shi atqyshtar devızıasynyń quramynda soǵysqan, atqyshtar vzvodynyń komandıri, İİ dárejeli "Otan soǵysy" ordenimen, "Belorýssıany azat etkeni úshin", "Germanıany jeńgeni úshin", "Jaýyngerlik eńbegi úshin" medaldarymen marapattalǵan – Bıset Majaǵulov;

- Volhov maıdanynda úsh jyl boıy mergen bolǵan, I jáne II dárejeli "Otan soǵysy", "Qyzyl Juldyz" ordenderiniń, "Jaýyngerlik eńbegi úshin" medaliniń ıegeri – Sıraj Ysmaǵulov;

- Qıyr Shyǵys maıdanynda soǵysqan, İİ dárejeli "Otan soǵysy" ordenimen, "Erligi úshin" medalimen marapattalǵan – Tashaýhan Álimbekov;

- Stalıngrad shaıqasyna qatysýshy, "Otan soǵysy" jáne "Qyzyl Juldyz" ordenderiniń, Germanıany jeńgeni úshin, sondaı-aq "Marshal G. Jýkov" medaliniń ıegeri – Vasılıı Zınchenko;

- 3-shi Ýkraın maıdanynda qyzmet etken, 40-shy gvardıalyq dıvızıanyń áskerı-dalalyq hırýrgy, "Otan soǵysy", "Qurmet" ordenderimen, mereıtoılyq medaldarmen marapattalǵan – Sofa Izmaılova;

- 2-shi Belorýss maıdanynda soǵysqan, "Otan soǵysy" ordenimen, "Erligi úshin" medalimen marapattalǵan – Qońyr Meńdiqaraev;

- Polsha men Fınlándıany azat etýge qatysqan, 1-shi Ýkraın maıdanynda soǵysqan, maıdandaǵy áskerı joryǵyn 1945 jyly Berlınde aıaqtaǵan – Stepan Popykın;

- 277-shi atqyshtar dıvızıasynyń 852-shi polkinde qyzmet etken, Qytaıdyń Qıyr Shyǵys maıdanynda, Manchjýrıada soǵysqan, "Marshal G. K. Jýkov", "Japonıany jeńgeni úshin" medaldaryn ıelengen – Fedor Sabaev;

- Qıyr Shyǵystaǵy japondyqtarǵa qarsy shaıqasqa qatysqan Aleksandr Polkın bar.

Esterińizge sala keteıik, Memleket basshysynyń tapsyrmasyna sáıkes, aǵymdaǵy jyly Uly Jeńistiń 75 jyldyǵy qurmetine, Almaty qalasynyń ákimi Baqytjan Saǵyntaevtyń qoldaýymen 18 296 adam 1,3 mlrd tg kóleminde birrettik tólem aldy. Sonyń ishinde 202 UOS-nyń qatysýshysy men múgedekteri 1 mln tg aldy.