QR ındýstrıa jáne ınfraqurylymdyq damý mınıstrligi komýnaldyq qyzmetter úshin 15 myń teńge kimge tólenetinin málimdedi. 

«Memleket basshysynyń tapsyrmasyn oryndaý maqsatynda aǵymdaǵy jyldyń 9 mamyrynda karantın rejımi kezeńinde komýnaldyq qyzmetterdi jetkizýshilerdiń shyǵyndaryn óteý erejesine ózgerister men tolyqtyrýlar engizildi (QR Indýstrıa jáne ınfraqurylymdyq damý mınıstriniń 2020 jylǵy 18 sáýirdegi № 212 buıryǵy)», delingen vedomstvo taratqan habarlamada.

Vedomstvonyń habarlaýynsha, belgili bir sanattaǵy adamdarmen birge turatyn otbasy múshelerine komýnaldyq qyzmetter úshin tólemderdi óteý boıynsha normalar engizilgen. Atap aıtqanda:

1) 1, 2, 3 top múgedekteri;

2) Uly Otan soǵysynyń múgedekteri men qatysýshylary, Uly Otan soǵysynyń múgedekteri men qatysýshylaryna teńestirilgen adamdar;

3) múgedek balalardy tárbıelep otyrǵan otbasylar;

4) kóp balaly otbasylar;

5) eń tómengi jáne odan tómen zeınetaqy alatyn zeınetkerler, jalǵyzbasty zeınetkerler;

6) memlekettik nemese qoǵamdyq mindetterdi, áskerı qyzmetti oryndaý kezinde, ǵarysh keńistigine ushýdy daıyndaý nemese júzege asyrý kezinde, adam ómirin qutqarý kezinde, quqyq tártibin qorǵaý kezinde qaza tapqan (qaıtys bolǵan) adamdardyń otbasylary;

7) ataýly áleýmettik kómek alatyn azamattar.

Budan basqa, komýnaldyq qyzmetterdi tóleý boıynsha tólemderdi jergilikti búdjetten ótegen jaǵdaıda ákimdikterge alýshylardyń sanatyn, óteý sharttary men tártibin anyqtaý boıynsha múmkindik berildi.