Almatyda Uly Jeńistiń 75 jyldyǵyna oraı iske qosylǵan eske alý jáne alǵys aıtý aksıasy áleýmettik jelilerde qarqyn aldy. Bul týraly almaty.tv habarlaıdy.

«Kanıkýly Off-Line 2» fılminde oınaǵan qazaqstandyq jas akter Aıbar Tańǵyt óziniń Instagram paraqshasynda #UlyDalaBatyrlary chellendjin iske qosty.

Jas akter óziniń atasy 391-shi atqyshtar dıvızıasy ári 1024-shi atqyshtar polkiniń jaýyngeri Qazken Tyshtyqbaevtyń áskerı erlikteri týraly aıtyp berdi.

Bul chellendj tek Uly Jeńisti ǵana emes, bolashaq urpaqtyń beıbit ómiri úshin janyn qıǵan batyrlarymyzdy da umytpaýǵa úndeıdi.

«Atalǵan aksıaǵa birqatar qazaqstandyq tanymal adamdar qoldaý bildirdi. Olardyń arasynda ánshi, Qazaqstannyń eńbek sińirgen qaıratkeri Mádına Sádýaqasova, akter, rejıser jáne prodúser Sanjar Mádıev, bıznesmen Beıbit Álibekov, sportshy Aldıar Álibekov, ánshi Álisher Karımov, aktrısa Dına Tasbolatova, artıs ári sıqyrshy Murat Mutyrǵanov, aktrısa Bıbigúl Aqtan, akter Ermek Turǵanbek, «BestBrothers» mýzykalyq toby, sondaı-aq jas juldyzdar: akter Beket Múkenev, ıllústrator Hanıfa Maǵjan, aktrısa, jýrnalıs ári bloger Arýjan Hafız, model Krıstına Kırıchenko, akter Aıbat Oljataı jáne taǵy basqalar bar», delingen habarlamada.

Joba qatysýshylary sondaı-aq, halyq jadyndaǵy batyrlardyń erlikterin máńgi este qaldyrý úshin bárimizdi osy qatarǵa qosylýǵa shaqyrdy. Soǵys qaharmandary biz úshin otanshyldyq pen adaldyqtyń, adamgershilik pen abyroıdyń bıik úlgisi. Osynaý rýhanı qundylyqtardy saqtaý jáne ardagerlerimizdi meıirim men qamqorlyqqa bóleý asa mańyzdy.