Qazaqstannan maıdanǵa attanǵan 1 mıllıonnan astam jaýyngerdiń 528-i Keńes Odaǵy batyry ataǵyn aldy. Onyń júzden astamy – qazaqtar. Al 110 qazaqstandyq úshinshi dárejeli Dańq ordenimen marapattaldy.

Ótken ǵasyrdaǵy surapyl soǵysta shaıqasqan barlyq jaýyngerdiń maqsaty bir boldy. Ol maqsat – Jeńis úshin qoldan kelgendi aıanbaý.

Maıdan dalasynda erekshe erlik kórsetken 4 sarbaz eki márte Keńes Odaǵynyń batyry ataǵyn aldy. Olar: Talǵat Bıgeldınov, Leonıd Beda, Sergeı Lýganskıı jáne Ivan Pavlov.

Boıjetken shaǵynda maıdanǵa óz erkimen suranǵan Álıa Moldaǵulova men Mánshúk Mámetovanyń erlik joly da eshqashan umytylmaq emes. Eki ójet qyzǵa da Keńes Odaǵynyń batyry ataǵy berildi.

Ekinshi dúnıejúzilik soǵysta tyl eńbekkerleriniń de qosqan úlesi zor.

Surapyl soǵysta qoldanylǵan 10 oqtyń 9-y qazaq jerinde óńdeldi. Kolhozdar men sovhozdar maıdanǵa azyq-túlik pen kıim-keshekten bólek,  mal, tipti aýyl sharýashylyq tehnıkasyn jiberip otyrdy. 1942-1943 jyldar aralyǵynda respýblıka aýyl sharýashylyǵynan 4111 traktor, 1184 júk mashınalary, 30318 jylqy maıdanǵa jiberilgen.