Prezıdent Q.Toqaev tótenshe jaǵdaı rejımin qamtamasyz etý jónindegi memlekettik komısıanyń qorytyndy otyrysynda sý tasqynynan zardap shekken Maqtaaral aýdany turǵyndarynyń mal shyǵyny, tasqynnyń aýyl sharýashylyǵy alqaptaryna tıgizgen zıany óteletinin málimdedi.

– Qazir sý tasqynynyń zardaptaryn joıý, tazalaý jumystary júrgizilýde. Biz aýdannyń kúndelikti tirshiligin qaıta qalpyna keltirý úshin qajetti sharalar qabyldaımyz. Jalpy kúzge deıin qıraǵan úılerdiń ornyna jańa turǵyn úıler salynady. Zardap shekken árbir adamǵa 100 myń teńge kóleminde ótemaqy tólenedi. Mal shyǵyny, tasqynnyń aýyl sharýashylyǵy alqaptaryna tıgizgen zıany óteledi. Jalpy, zardap shekken aýyldardyń árbir azamaty qamqorlyqsyz qalmaıdy. Olarǵa járdem beremiz, –  dedi prezıdent.