Elimizde jarıalanǵan tótenshe jaǵdaıǵa qaramastan Shyǵys Qazaqstandaǵy iri kásiporyndar jumysyn toqtatpaıdy.
SHQO kásipkerler palatasy dırektorynyń orynbasary Qaırat Mamyrbaevtyń aıtýynsha, palata qyzmetkerleri TJ jarıalanǵan birinshi kúnnen bastap kásipkerlik sýbektilerine baryp, Qazaqstan Respýblıkasyndaǵy daǵdarystyń aldyn alý jumystary qalaı júrgizilip jatqanyn túsindirýde. Búginde birqatar sharalar qabyldanyp, sonyń negizinde týrızm, qonaqúı qyzmeti men qoǵamdyq tamaqtaný oryndarynyń ıeleri salyqtan bosatyldy. 1 maýsymnan bastap mıkro, shaǵyn jáne orta bıznes ókilderi salyqtan bosatylady. Sondaı-aq barlyq bıznes sýbektisi úsh aı boıy nesıeni tóleýdi keıingi shegere alady.
Kásiporyndardyń kóbi jumysyn toqtata almaıdy nemese basshylyq qyzmetkerlerin qashyqtyqtan eńbek etýge jibere alady. «Sılýmın-Vostok» JSHS-niń dırektory Zoıa Novolodskaıanyń aıtýynsha, atalmysh kompanıa tótenshe jaǵdaıǵa baılanysty birde-bir qyzmetkerdi eńbek demalysyna nemese sebepsiz jumystan bosatpaǵan.
– Bizdiń kásiporynda koronavırýstyq ınfeksıanyń aldyn alý maqsatynda profılaktıkalyq sharalar jasalady. Kompanıa 100 paıyz qajetti quraldarmen jabdyqtalǵan. Biz mashına qurastyrý jumysyn toqtata almaımyz. Óıtkeni osy kásiporynda shyǵarylatyn tehnıka komýnaldyq qyzmet úshin aýadaı qajet. Árıne, TJ kezinde kóptegen saýal týyndaıdy. Sonymen qatar kásiporynǵa qarjylyq turǵydan aýyrtpashylyq túsip, kompanıanyń búdjeti azaıady. Sóz sońynda Memleket basshysy Qasym-Jomart Toqaevqa kásipkerlerge kórsetip otyrǵan qoldaýy úshin alǵys aıtqym keledi, - dedi Zoıa Novolodskaıa.
Alaıda kúsh-qýatyn azaıtqan kásiporyndar da bar. Solardyń biri - «ÝK Trıpleks». Atalmysh kompanıa shyny shyǵarýymen aınalysady. Búginde bul kásiporyn qyzmetkerleriniń 30 paıyzy ǵana jumys istep júr. Qalǵan 70 paıyzy aqyly eńbek demalysyna jiberilgen.
– Elimizde jarıalanǵan tótenshe jaǵdaıǵa baılanysty bizdiń kásiporyn qyzmetkerleri qysqartylǵan rejımde júmys isteýge kóshti. Jumysshylardyń deni aqyly eńbek demalysyna shyqty. Al qalǵandary qyzmettik kólikpen jumysqa keledi. Budan bólek biz jumys ýaqytyn qysqarttyq, - deı kele «ÝK Trıpleks» JSHS-niń dırektory Konstantın Borodastov: - Osyndaı qıyn kezeńde bizge kómek kórsetip, nesıeni tóleý merzimin 90 kúnge deıin shegergeni úshin úkimetke alǵys aıtamyn. Karatın aıaqtalǵan soń bizdiń kásiporyn tolyq kúsh-qýatpen jumysqa kirisedi.
Pikir qaldyrý