Jaqynda ǵana partıa quratynyn aıtyp, partıasynyń atyn "Sen" dep qoıǵanyn jarıalaǵan kásipker Ahmetbek Nursıla "Men qurǵan partıa úshin 100 000 adam daıyn tur" dep málimdedi. Bul týraly Qamshy tilshisi habarlaıdy.

Óziniń "Bıznes Bastaý" dep atalatyn YouTube arnasynda tikeleı efırge shyqqan bıznes trenerdiń aıtýynsha, onyń komandasy partıa qurýǵa daıyndalǵanyna uzaq ýaqyt bolǵan. Tikeleı efırde Ahmetbek Nursıla óziniń bızneske tárbıeleıtin mektebinen 40 000-ǵa jýyq adamnyń oqyp shyqqanyn aıtty. Kásipkerdiń oıynsha, onyń bastamasyn bıznes mektebin bitirgen túlekterdiń barlyǵy jáne olardyń tanystary men týysqandary, dos-jarandary qoldaıdy. Al, olardyń jalpy sany 100 myńǵa jetetin kórinedi.

–Biz úshin 20 myń adamdy jınaý bir-aq kúndik jumys,– degen kásipker partıanyń birinshi quryltaıy 26 tamyzda bolatynyn aıtty. Onyń sebebin "sol kúni qazaqtyń terıtorıasy bekitilip,  birinshi respýblıkasy qurylǵan" dep túsindirdi.