Búgin keshki saǵat 20:00-de YouTube áleýmettik jelisinde tikeleı efırde "Sen" partıasyn qurýshy medıatrener Ahmetbek Nursıla men Italıadaǵy oppozısıoner Erjan Turǵymbaı arasynda saıası debat ótti. Bul týraly Qamshy tilshisi habarlaıdy.

Emosıaǵa toly ótken debattyń jalpy barysynda Erjan Turǵymbaı "sender saıası oıynshysyńdar" degen oıyna tabandy bolsa, Ahmetbek Nursıla "Shetelde jatyp, halyqty arandatpaı, elge kelip halyqpen birge kúresińder" degen kózqarasyn kórsetti. 

Saıası debat kezinda Erjan Turǵymbaı 2017 jyldan beri saıasatqa kelgenin, saıası tartysta 2 jyldaı tájirıbesi bar ekenin aıtyp , Ahmetbek Nursıladan saıasattan qanshalyq bilimi barlyǵy týraly, bıliktiń tarmaqtary týraly negiz suraqtardy qamtyǵan birneshe saýal qoıdy.

Al Ahmetbek "2001-2002 jyldarda  Rahat Álıev eldi búldirip jatqanda, mıtıńige shyǵyp, minberde sóılegen biz bolatynbyz. Meniń dosym Tólen Toqtasynov prezıdentke kúıeý balań eldi tonap jatyr degende, depýtattar jýrnalıserge ıntervú bere almaı kabınetterine tyǵylyp qalǵan" dep sol kezde qamalǵan dostary Ǵalymjan Jaqıanov pen Lýkın Aleksandrǵa pıket uıymdastyrǵanyn aıtty.

Daıyndap kelgen suraqtaryn Nursılaǵa bir-birlep qoıǵan Erjan Turǵymbaı jańa partıa qurǵan kásipkerdiń ekonomıkalyq, saıası qabiletterine ǵana emes, halyq úshin qyzmet kórsetetinine kúmán keltiretinin jetkizdi. 

Bir jarym saǵatqa jýyq jalǵasqan emosıaǵa toly sózjarystyń sońynda Ahmetbek Nursıla debatty aıaqtaýǵa májbúr bolǵanyn aıtyp, efırden ketip qaldy.